Avazxon Tadjixanov yaponiyalik kinoijodkorlar bilan uchrashdi
2024-11-28 20:55:00 / Yangiliklar
#Xalqaro_hamkorlik
Bugun, 28-noyabr kuni madaniyat vazirining birinchi o‘rinbosari Avazxon Tadjixanov hamda Yaponiyaning Ceremony Co.Group kompaniyasi rahbari Tsukasa Shiga o‘rtasida hamkorlik uchrashuvi bo‘lib o‘tdi.
Uchrashuv avvalida ikki davlat o’rtasidagi so’nggi yillardagi madaniyat sohasidagi hamkorlik rivojlanib borayotganligi ta’kidlandi.
Xususan, o‘zbek va yapon kinoijodkorlari hamkorligida suratga olingan olimpiada chempioni Bahodir Jalolov to‘g‘risidagi “Yengilmas. Tokiyoga yo‘l” filmi haqida aytib o’tildi, ushbu film ikkala davlat ijodkorlari uchun ham kinoindustriya sohasidagi yaxshigina tajriba almashinuv maydoni bo‘lib xizmat qilganligi alohida e’tirof etildi.
Shuningdek, yapon tarafi O'zbekistonda kino tasvirga olish istagi borligi, shuningdek, o'zbek kinoijodkorlari bilan hamkorlikda qo'shma loyihalar amalga oshirishni rejalashtirayotganligini bildirdi.
2025-yilda tashkil etilishi rejalashtirilayotgan Toshkent kino festivalida o'zi suratga olgan 2 ta film bilan ishtirok etish istagi borligini ma'lum qildi.
O'zbekiston va Yaponiya o'rtasida madaniy hamkorlikni rivojlantirish, xususan yaponiyalik mahalliy aholi orasida O'zbekiston tarixi, madaniyati haqida yanada ko'proq ma'lumot berish maqsadida qo'shma kinoloyihalarni amalga oshirish maqsadida ekanligi ma'lum qilindi.
Iliq va samimiy o‘tgan ushrashuvda ikki tomonlama madaniy aloqalarni rivojlantirish, nafaqat kino, balki teatr va boshqa yo‘nalishlarda ham o‘zaro hamkorlikni yo‘lga qo‘yish, birgalikda xalqaro loyihalarni amalga oshirish yuzasidan kelishib olindi.