O‘zbekiston Respublikasi Madaniyat vazirligi

Bugun, 28-noyabr kuni madaniyat vaziri Ozodbek Nazarbekov boshchiligida energiya resurslaridan foydalanish samaradorligini oshirish hamda 2024-2025-yillarda kuz-qish mavsumiga tayyorgarlik ishlarining borishi masalalariga bag‘ishlangan  yig‘ilish o‘tkazildi.

Yig‘ilishda vazir o‘rinbosari Yusufjon Usmonov, vazirlik markaziy apparati xodimlari hamda onlayn tartibda hududiy tizim tashkiloti rahbarlari ishtirok etishdi.

Yig‘ilish davomida Prezidentning 2023-yildagi PQ-118-son qarorlariga asosan 2023-2024-yillarda kuz-qish davrida obyektlarning barqaror ishlashini ta’minlash maqsadida mahalliy hokimliklar tomonidan tizimdagi 260 ta muassasalarning isitish tizimlari DXSH asosida modernizatsiya va ekspluatatsiya qilish bo‘yicha tadbirkorlar bilan 110 ta bitimlar imzolanganligi biroq, tadbirkorlar bilan tuzilgan bitimlar ijrosi Bosh prokuratura Respublika Shtabi tomonidan o‘rganilganda bir qator kamchiliklar aniqlanganligi muhokama etilib, tegishli mas’ullarga vazifalar belgilandi.

Navbatdagi masalada, Prezidentning “Energiya resurslaridan foydalanish samaradorligini oshirish bo‘yicha qo‘shimcha chora-tadbirlar to‘g‘risida”gi 2024-yil 14-iyundagi PQ–222-son qarori bilan tarmoqlar kesimida 2024-yilda elektr energiyasi va tabiiy gazni iqtisod qilishning maqsadli ko‘rsatkichlari tasdiqlanganligi, davlatimiz rahbari boshchiligida 2024-yil 12-iyul kuni o‘tkazilgan videoselektor yig‘ilishida energiya resurslarini qo‘shimcha 10 foizga iqtisod qilish bo‘yicha topshiriq berilganligi, mazkur qarorning ijrosini ta’minlash maqsadida Bosh prokuraturasi bilan birgalikda joriy yilning sentyabr-dekabr oylari uchun vazirlikning Energiya samaradorligini oshirish va iqtisod qilish yuzasidan “Yo‘l xaritasi” ishlab chiqilib tasdiqlanganligi, maqsadli ko‘rsatkichlarni bajarilishi yuzasidan barcha zaruriy chora-tadbirlar belgilanganligi, unga ko‘ra, joriy yilning sentyabr-dekabr oylarida Madaniyat vazirligi tasarrufidagi tizim tashkilotlari tomonidan 338 ming kVt soat elektr energiyasi va 76 ming kub metr tabiiy gazni iqtisod qilish rejalashtirilganligi ta’kidlandi.

Yig‘ilish yakunida kun tartibidagi masalalar yuzasidan mas’ullarga tegishli vazifalar berilib, ijro muddatlari belgilandi hamda topshiriqlarni belgilangan muddatlarda bajarish lozimligi haqida ogohlantirildi.