Xabaringiz bor 18-20-noyabr kunlari Rossiya Federatsiyasida “O‘zbekiston madaniyati kunlari” bo‘lib o‘tdi. 

 

Madaniyat kunlari doirasida S.A.Gerasimov nomidagi Butunrossiya davlat kinematografiya instituti rektori Vladimir Malishev  va professor o'qituvchilari bilan uchrashuv o'tkazilib, institutda tahsil olayotgan o'zbekistonlik talabalar bilan suhbatlashildi.

 

Uchrashuvda O'zbekiston madaniyat vazirining birinchi o'rinbosari Avazxon Tadjixanov, vazirlikning mas'ul boshqarma boshlig'i hamda O'zbekiston Madaniyat vazirligi huzuridagi Kinematografiya agentligi direktori Shuhrat Rizayevlar ishtirok etishdi.

 

Uchrashuv davomida, Rossiya Federatsiyasida tashkil etilgan “O‘zbekiston madaniyati kunlari” doirasida Rossiya Federatsiyasi madaniyat vaziri Olga Lyubimova va O‘zbekiston Respublikasi madaniyat vaziri Ozodbek Nazarbekov raisligida bo'lib o'tgan O‘zbekiston Respublikasi va Rossiya Federatsiyasi o‘rtasidagi iqtisodiy hamkorlik bo‘yicha hukumatlararo komissiyaning Madaniyat bo‘yicha qo‘yi qo‘mitasining IV yig‘ilishida kino sohasidagi hamkorlik borasidagi rejalar xususida fikrlashildi.

 

Eslatib o'tamiz, uchrashuvda Olga Lyubimova "Uchinchi yig‘ilish 2023-yilning may oyida Toshkentda bo‘lib o‘tgan edi. Bu vaqt davomida har ikki mamlakat uchun ham muhim bo‘lgan bir nechta loyihalar amalga oshirildi. Birgalikda kino ishlab chiqarish sohasida hamkorlik shartnomalarining imzolanishi asosiy voqealardan biri bo‘ldi. Bu bizning kino ijodkorlarimiz uchun muhim, chunki endilikda ularda milliy filmlarni xalqaro maydonlarda namoyish etish imkoniyati mavjud. Bundan tashqari, biz xalqaro festivallar, kino ta’limi bo‘yicha tajriba almashish kabi hamkorlikning yangi formatlarini rivojlantirish masalalarini ham ko‘rib chiqyapmiz. Ishonchim komilki, bunday tashabbuslar nafaqat mamlakatlarimiz o‘rtasidagi aloqalarni mustahkamlash, balki, kino ishlab chiqarish sifatini yaxshilashga ham xizmat qiladi. Shuningdek, bu xalqaro loyihalar bo‘yicha ishlaydigan va boshqa mamlakatlardagi hamkasblari bilan tajriba almashish istagida bo‘lgan yosh iste’dodlar uchun ham yangi imkoniyatlar yaratadi" - degandi.

 

Uchrashuvdan so'ng intstitutda tahsil olayotgan o'zbekistonlik talabalarning ta'lim jarayonlari bilan tanishilib, ular bilan suhbatlashildi.

 

Ma'lumot o'rnida, Institut 1919-yilda rejissyor Vladimir Gardin tomonidan Moskva kino maktabi sifatida tashkil etilgan va dunyodagi birinchi va eng qadimgi kino maktabidir.