O‘zbekiston Respublikasi Madaniyat vazirligi

Poytaxtda Alisher Navoiy nomidagi O‘zbekiston davlat akademik katta teatrida qoraqalpoq shoiri va mutafakkiri Ajiniyoz Qo‘siboy o‘g‘li tavalludining 200 yilligiga bag‘ishlangan adabiy — ma’rifiy kecha tadbiri hamda O‘zbekiston Milliy kino san’ati saroyida “Ajiniyoz” badiiy-publitsistik filmining katta premyerasi bo‘lib o‘tdi.  

Dastlab Alisher Navoiy nomidagi O‘zbekiston davlat akademik katta teatrida Ajiniyoz Qo‘siboy o‘g‘li tavalludining 200 yilligi munosabati bilan tantanali adabiy-badiiy xotira kechasi bo‘lib o‘tdi.

Ushbu adabiy-badiiy xotira kechasida madaniyat vaziri o‘rinbosari Yusufjon Usmonov,  taniqli davlat va jamoat arboblari, yozuvchi-shoirlar, madaniyat va san’at namoyandalari, keng jamoatchilik hamda ommaviy axborot vositalari vakillari ishtirok etishmoqda.

Prezident Shavkat Mirziyoyev 2024-yil 16-iyulda Ajiniyoz Qo‘siboy o‘g‘li tavalludining 200 yilligini keng nishonlash to‘g‘risidagi qarorni imzolagandi.

 Ajiniyoz Qo‘siboy o‘g‘li tavalludiga bag‘ishlab o‘tkazilgan tadbirda shoirning she’rlari asosida yaratilgan qo‘shiqlar, o‘lanlar ijro etildi. O‘zbek va qoraqalpoq shoirlari so‘zga chiqib, Ajiniyozning turkiy ellar adabiyotida tutgan o‘rni va ahamiyatini ta’kidladi.

 Shuningdek, bayram oqshomida qoraqalpoq milliy san’ati namunalari ham namoyish etildi.

So‘ng, O‘zbekiston Milliy kino san’ati saroyida Madaniyat vazirligi huzuridagi Kinematografiya agentligi buyurtmasiga asosan “Qaraqalpaqfilm” kinostudiyasi tomonidan suratga olingan “Ajiniyoz” badiiy-publitsistik filmining katta premyerasi bo‘lib o‘tdi.

Namoyishda Qoraqalpog‘iston Respublikasi Jo‘qorg‘i Kengesining raisi Orinbayev Amanbay Tleubayevich, Kinematografiya agentligi direktorining o‘rinbosari Alisher Xodjayev, O‘zbekiston Kinoarboblari ijodiy uyushmasi raisi Matyoqub Matchonov, O‘zbekistonda xizmat ko‘rsatgan yoshlar murabbiysi Jamila Shermuhammedova, O‘zbekiston Yozuvchilar uyushmasi raisining birinchi o‘rinbosari Minhojiddin Mirzo, filmning ijodkorlari, Toshkent shahridagi bir guruh oliy ta’lim muassasasida tahsil olayotgan talaba-yoshlar hamda Ommaviy axborot vositalari vakillari ishtirok etishdi. Film ijodkorlari suratga olish jarayonlari va kartinadan ko‘zlangan maqsad haqida atroflicha fikr bildirdi.

Filmga premyerasiga 4 000 nafardan ortiq tomoshabin yig‘ildi.

Shuningdek, tomoshabinlar yangi ekspozitsiyalar bilan boyitilgan O‘zbekiston kino san’ati muzeyi bilan tanishishdi. Ularda ijodkor haqidagi film hamda muzey yorqin taassurot qoldirdi.