O‘zbekiston — Rossiya munosabatlari so‘nggi yillarda mamlakatlarimiz hamkorligining ko‘plab sohalarida ijobiy natijalarga erishmoqda.

 

Xususan, ikki davlatning madaniy sohadagi hamkorligini mustahkamlash borasida qator amaliy ishlar olib borilmoqda. Ayni kunlarda ikki davlat o‘rtasidagi madaniy hamkorlik aloqalarini yanada mustahkam maqsadida, Rossiya Federatsiyasida “O‘zbekiston madaniyati kunlari”  o‘tkazilmoqda. Unda turli madaniy tadbirlarning o‘tkazilishi rejalashtirilgan bo‘lib, jumladan joriy yilning 19-noyabr kuni Moskva shahridagi Kreml davlat saroyida “Vecher zvyozd Uzbekistana” nomli o‘zbek san’ati ustalari ishtirokida konsert dasturi namoyishi rejalashtirilgan. 

 

Bugun Rossiyada “O‘zbekiston madaniyati kunlari” doirasida  Rossiya Federatsiyasi va O‘zbekiston Respublikasi o‘rtasidagi iqtisodiy hamkorlik bo‘yicha hukumatlararo komissiyasi madaniyat bo‘yicha qo‘mitaning to‘rtinchi yig‘ilishi bo‘lib o‘tdi. Unda O‘zbekiston Respublikasi madaniyat vaziri Ozodbek Nazarbekov va Rossiya Federatsiyasi madaniyat vaziri Olga Lyubimova o‘rtasida hamkorlik uchrashuvi bo‘lib o‘tdi. Uchrashuvda ikki davlat vakillaridan iborat delegatsiya ham ishtirok etdi.

 

Uchrashuv avvalida Rossiya Federatsiyasi madaniyat vaziri Olga Lyubimova O‘zbekiston — Rossiya munosabatlarining so‘nggi yillaridagi keng qamrovli hamkorligi, ko‘plab sohalarida ijobiy natijalarga erishayotganligi, hozirgi kunda mamlakatlarimiz o‘zaro aloqa o‘rnatmagan sohaning o‘zi qolmaganligini ta’kidladi.

 

“Moskvaga tashrif buyurgan o‘zbekistonlik hamkasblarimga salom! Shunday vakillik delegatsiyasining Rossiya poytaxtiga tashrif buyurganidan xursandman. Umid qilamanki, tashrifingiz samarali bo‘ladi va sizda ajoyib taassurotlar qoldiradi. Madaniyat bo‘yicha quyi qo‘mitalar yig‘ilishlari muntazam ravishda o‘tkazib kelinayotgani quvonarli, bu har yili hamkorlikdagi ish natijalarini sarhisob qilish va kelajak rejalarini konstruktiv muhokama qilish imkonini beradi. 2023-yil 22-may kuni Toshkent shahrida quyi qo‘mitaning uchinchi yig‘ilishi bo‘lib o‘tdi. Shu vaqt ichida madaniyatning barcha jabhalarida ko‘plab qo‘shma loyihalarni amalga oshirdik, hamkorligimiz prinsipial jihatdan yangi bosqichga ko‘tarildi. - O‘rnatilgan ijodiy hamkorlikni ishonch bilan qayd etishimiz mumkin va bu yil madaniy muloqotni qo‘llab-quvvatlash yili bo‘ldi” – dedi Olga Lyubimova. 

 

So‘ng, O‘zbekiston Respublikasi madaniyat vaziri Ozodbek Nazarbekov ikki davlat o‘rtasidagi madaniy hamkorlik aloqalari haqida so‘z yuritdi.

 

“Ta’kidlash joizki, Hukumatlararo komissiyaning Madaniyat bo‘yicha quyi qo‘mitasi mamlakatlarimiz o‘rtasidagi madaniy aloqalarni rivojlantirishda muhim o‘rin tutadi. Madaniy-gumanitar sohadagi hamkorlik ikki tomonlama munosabatlarni mustahkamlashda muhim ahamiyat kasb etayotgani, ayniqsa, quvonarlidir. So‘nggi yillarda Rossiya va O‘zbekistonning madaniyat sohasidagi o‘zaro hamkorligi yangi sifat bosqichiga ko‘tarildi. Ishonchimiz komilki, shu kunlarda Moskva shahrida o‘tkazilayotgan “O‘zbekiston madaniyati kunlari” madaniy hamkorligimiz tarixida alohida ahamiyatga ega bo‘ladi. Zamonaviy dunyoda, yangi chaqiriq va talablar paydo bo‘lganda, madaniy-gumanitar hamkorlikni jadallashtirish ayniqsa muhimdir. Madaniyat har qanday tarixiy lahzada xalqlarga umid baxsh etuvchi omildir. Shu munosabat bilan o‘zaro hurmat va teng huquqlilikka asoslangan munosabatlarni rivojlantirish, ikki tomon uchun qiziqarli bo‘lgan qo‘shma loyihalarni ilgari surish muhim ahamiyatga ega” – dedi Ozodbek Nazarbekov.  

 

Uchrashuv yakunida, Hukumatlararo komissiyaning Madaniyat bo‘yicha quyi qo‘mitasining to‘rtinchi majlisi bayonnomasi imzolandi.