Bahodir Ahmedov Namangan viloyatida xizmat safarida bo‘ldi
2024-11-12 16:55:00 / Yangiliklar
Kuni kecha madaniyat vazirining birinchi o‘rinbosari Bahodir Ahmedov Namangan viloyatida xizmat safarida bo‘ldi.
Xizmat safarining ilk kuni Bahodir Ahmedov Namanganning Qo‘g‘irchoq teatrida bo‘lib, teatr faoliyati hamda yaratilgan shart-sharoitlar bilan yaqindan tanishdi, teatr jamoasi bilan aktyorning mas’uliyati, o‘z mahoratini oshirish bo‘yicha o‘z ustida ishlashi, aktyorlik madaniyati to‘g‘risida fikr bildirdi. Teatr jamoasiga ahil bir oila bo‘lib faoliyat yuritilishi, rejissyor tomonidan doimo ijodiy izlanishlar olib borish, spektakllarni tarbiyaviy ahamiyatiga e’tibor qaratish kerakligi, yoshlarga milliy o‘zligimizni singdirish, sahna dekoratsiyalariga yangicha yondashish haqida tavsiyaviy fikr-mulohazalar bildirdi. Shuningdek, “Yashil makon” umummilliy loyihasi doirasida teatr binosi atrofiga Bahodir Ahmedov manzarali ko‘chatlar va gullar ekilishida ishtirok etdi.
Shundan so‘ng, 6-son madaniyat markazida bo‘ldi. Madaniyat markazida viloyatdagi folklor-etnografik jamoalarining repertuarlari bilan tanishdi. Jumladan; Namangan shahar “Yor-yor”, Uchqo‘rg‘on tumani “Yallama-yorim”, Uychi tuman “Uychi tongi” folklor-etnografik xalq jamoalari hamda Pop tumani “Hazratibob”, Chust tumani “Omon-yor”, Kosonsoy tumani “Dilxush” folklor jamoalarining repertuarlari bilan tanishdi. Jamoa ishtirokchilari bilan suhbatlashib, milliy qadriyatlarimiz, avloddan- avlodga o‘tib kelayotgan urf-odatlarimizni yoshlarga yetkazishda ijrochilar o‘z mahoratini oshirib borishi, sahna madaniyati, ijro etilayotgan asarlarni mazmun mohiyatiga va ularni tarbiyaviy ahamiyatiga e’tibor qaratilishi yuzasidan Bahodir Ahmedov tomonidan ko‘rsatmalar berildi. Shuningdek, “Yashil makon ” umummilliy loyihasi doirasida 6-son madaniyat markazi binosi atrofiga manzarali ko‘chatlar ekilishida ishtirok etdi.
Bahodir Ahmedov tomonidan Namangan viloyatining Mingbuloq va Namangan tumanlarida madaniyat va san’at sohasida amalga oshirilgan ishlar, tumanlardagi madaniyat muassasalari joyiga chiqqan holda o‘rganildi.
Xizmat safari davomida Prezidentning Farmon va qarorlari ijrosini ta’minlash maqsadida madaniyat va san’at muassasalari tomonidan olib borilayotgan chora-tadbirlar o‘rganildi hamda ularga amaliy yordam ko‘rsatildi.
Tashrif davomida Bahodir Ahmedov Mingbuloq va Namangan tumanlarida bo‘lib, tuman madaniyat bo‘limi tizimidagi madaniyat markazlari faoliyati bilan tanishdi. Xususan, O‘zbekiston Respublikasi Prezidentining “Aholiga madaniy xizmat ko‘rsatish darajasini yanada oshirish chora-tadbirlari to‘g‘risida” 2023-yil 25-dekabrdagi PQ–406-son qarori ijrosini o‘z vaqtida ta’minlash uchun hududdagi badiiy jamoalarning faoliyati o‘rganilib, moddiy-texnik bazasi ko‘zdan kechirildi. Namangan viloyati Mingbuloq tumani 8-son madaniyat markazida faoliyat olib borayotgan “Yulduz” ashula va raqs xalq ansambli hamda yangi tashkil etilgan “Navbahor” folklor jamoasi faoliyati, repertuarlari va ansambl uchun yaratilgan sharoitlar bilan yaqindan tanishildi.
Markazning obodonlashtirish va kuz-qish mavsumiga tayyorgarlik holatini ko‘zdan kechirdi hamda bajarilishi lozim bo‘lgan ishlar yuzasidan ko‘rsatma va takliflar berildi.
Kun yakunida Bahodir Ahmedov Namangan tumani 20-son madaniyat markazida bo‘lib, madaniyat bo‘limi qoshidagi “Olvalizor gullari” hamda “Nihol” ashula va raqs xalq ansambllarining faoliyati, repertuarlari va ansambl uchun yaratilgan sharoitlar bilan yaqindan tanishildi.
Madaniyat markazini obodonlashtirish va kuz-qish mavsumiga tayyorgarlik holatini ko‘zdan kechirdi hamda bajarilishi lozim bo‘lgan ishlar yuzasidan ko‘rsatma va takliflar berildi
Tuman madaniyat markazi tomosha zalida tumandagi madaniyat muassasalari rahbarlari bilan uchrashib, tumanlardagi madaniyat va san’at sohalarida erishilgan yutuqlar, yo‘l qo‘yilgan kamchiliklar hamda amalga oshirilishi lozim bo‘lgan vazifalar rahbar hamda xodimlarga ko‘rsatmalar berildi.