Yusufjon Usmonov Xorazm viloyatida xizmat safarida bo‘ldi
2024-11-09 15:10:00 / Yangiliklar
Avvalroq, madaniyat vaziri o‘rinbosari Yusufjon Usmonov Xorazm viloyatida xizmat safarida bo‘lganligi haqida xabar berilgan edi.
Joriy yilning 8-noyabr kuni Yusufjon Usmonov Xorazm viloyatining Yangibozor tumanidagi 16-sonli bolalar musiqa va san'at maktabi hamda madaniyat markazlarida bo‘lib, ularning moddiy-texnik bazasi mustahkamligi, cholg‘u asboblari bilan ta'minlanganligi, o‘quvchilarga yaratilgan sharoitlar, shuningdek, binolarning kuz-qish mavsumiga tayyorgarlik holatini o‘rgandi.
Shuningdek, Bog‘ot tumanida Qal'ajiqqal'a tarixiy majmuasida tadbirkorlar tomonidan barpo etilayotgan kinoshaharcha va madaniy pavilyon hududi, Urganch shahrida yangidan barpo etilayotgan O‘zbekiston davlat filarmoniyasi Xorazm viloyati bo‘linmasi binosining qurilish jarayonlari, Tuproqqal'a tumanida yangi quriladigan namunali madaniyat markazining loyihasi bilan tanishib, quruvchilarga loyiha bo‘yicha tegishli tavsiyalar berildi.
Bundan tashqari, O‘zbekiston davlat xoreografiya akademiyasi Urgach filiali hamda viloyat ko‘zi ojizlar kutubxonasi mutasaddilari, 3-sonli bolalar musiqa va san'at maktabi jamoasi bilan uchrashib, muammo va takliflari tinglandi.