O‘zbekiston xalq baxshilarining ijodiy-ma’rifiy kechasi o‘tkazildi
2024-11-09 10:55:00 / Yangiliklar
8-noyabr kuni Toshkent shahridagi “Ma’rifat markazi” Simpoziumlar saroyida O‘zbekiston xalq baxshilari Qahhor Rahimov, Boyqo‘chqor Ahmedov, Ochil Chorshanbiyev, Shodmon Xo‘jamberdiyev va Erkin O‘rolovlarning ijodiy-ma’rifiy kechasi tashkil etildi.
Ushbu ijodiy-ma’rifiy kechada madaniyat vaziri Ozodbek Nazarbekov hamda taniqli davlat va jamoat arboblari, yozuvchi-shoirlar, madaniyat va san’at namoyandalari, mahalla faollari, olimlar, talaba va o‘quvchilar, keng jamoatchilik hamda ommaviy axborot vositalari vakillari ishtirok etishdi.
Bugunga qadar Toshkent shahridagi “Ma’rifat markazi” Simpoziumlar saroyida O‘zbekiston Qahramoni, O‘zbekiston xalq artisti, o‘zbek maqomining chin ma’nodagi afsonasi, Munojat Yo‘lchiyeva, O‘zbekiston xalq artisti Jenisbek Piyazov va O‘zbekiston xalq artisti Abduhoshim Ismoilov va Yunus Rajabiy nomidagi maqom ansamblining ijodiy-ma’rifiy kechasi hamda Yunus Rajabiy nomidagi O‘zbek milliy musiqa san’ati instituti professor-o‘qituvchi va talaba-yoshlari tomonidan tayyorlangan “Mumtoz navolar” turkumidagi konsert dasturi, shuningdek O‘zbekiston davlat san’at va madaniyat instituti o‘qituvchilari ya’ni O‘zbekiston xalq artisti Xayrulla Lutfullayev, O‘zbekiston xalq hofizlari Beknazar Do‘stmurodov, Orolmirzo Safarov, Soyibjon Niyozov, Mashrab Ermatov, O‘zbekistonda xizmat ko‘rsatgan artistlar Hurriyat Isroilova, Ahmadjon Dadayevlarning ijodiy-ma’rifiy kechasi tashkil etilgan.
So‘nggi yillarda davlatimiz rahbari tashabbusi bilan baxshichilik san’atini targ‘ib etish va dunyoga tarannum etish bo‘yicha muhim tashabbuslar ilgari surilib, mazkur san’at turi bilan shug‘ullanuvchi ijodkorlar davlat tomonidan qo‘llab-quvvatlanib ularga yetarli sharoitlar yaratilmoqda.
Ayniqsa, baxshichilk san’atini targ‘ib etish uning ilmiy-nazariy jihatlarini o‘rganish bo‘yicha Xalqaro baxshichilik san’ati festivalini tashkil etish an’anaga aylanganiga barchamiz guvoh bo‘lmoqdamiz.
Shuningdek, mazkur san’at turini yosh avlodga singdirish, ustoz-shogird an’analari davom ettirish bo‘yicha muhim islohotlar amalga oshirilmoqda.
Jumladan, Prezidentning 2019-yildagi “Baxshichilik san’atini yanada rivojlantirish chora-tadbirlari to‘g‘risida”gi qaroriga asosan Respublika Baxshichilik san’ati markazi faoliyati yo‘lga qo‘yildi.
Musiqiy kechada baxshilarimiz ko‘plab go‘zal tarixiy dostonlardan namunalarni ijro etdi.
“Ma’rifat markazi” Simpoziumlar saroyida tashkil etilgan ijodiy-ma’rifiy kecha xushkayfiyatda o‘tkazildi.