Mamlakatimizda korrupsiyaga qarshi kurashish borasida muhim tashkiliy-huquqiy islohotlar amalga oshirilmoqda. Aholining huquqiy ongi va madaniyatini yuksaltirish, jamiyatda korrupsiyaga qarshi murosasiz munosabatni shakllantirishga yo‘naltirilgan tizimli chora-tadbirlar ko‘rilmoqda.

 

Ushbu sa’y-harakatlarning asosiy negizida “Inson qadri uchun” degan ezgu tamoyil mujassam ekani alohida diqqatga sazovordir.

 

O‘zbekiston Respublikasi Madaniyat vazirligining Korrupsiyaga qarshi kurashish xizmati 2024-yilning o‘tgan 9 oyi davomidagi faoliyatini vazirlik hududiy tarkibiy bo‘linmalari hamda tizim tashkilotlarida korrupsiyaga qarshi kurashish bo‘yicha amalga oshirilgan ishlar samaradorligi yuzasidan
2024-yilda o‘rganishlar rejasi asosida amalga oshirdi.

 

Sohada korrupsiyaga oid huquqbuzarliklar sodir etilishining oldini olish va korrupsiyaviy xavf-xatarlarni minimallashtirish maqsadida madaniyat vazirining tegishli buyrug‘i bilan “O‘zbekiston Respublikasi Madaniyat vazirligining korrupsiyaga qarshi kurashish bo‘yicha Siyosati” qabul qilingan.

 

2024-yilning o‘tgan 9 oyi davomida O‘zbekiston davlat san’at va madaniyat instituti huzuridagi Pedagog kadrlarni qayta tayyorlash va ularning malakasini oshirish tarmoq markazi bilan hamkorlikda Madaniyat vazirligi tasarrufidagi madaniyat boshqarma boshliqlari, bosh hisobchilari, Inson resurslarini boshqarish va rivojlantirish bo‘limi xodimlari, ixtisoslashtirilgan san’at maktablari direktorlari uchun 11 ta guruhda 215 nafar tinglovchiga 132 soatlik o‘quv kurslari tashkil etildi.

 

O‘quv kurslarida tinglovchilarga korrupsiyaga qarshi kurashishga oid davlat siyosatining asosiy yo‘nalishlari, madaniyat sohasiga daxldor farmonlar va qarorlar, bu borada mamlakatimizda olib borilayotgan islohotlarning mazmun-mohiyatini keng tushuntirish, moliyaviy savodxonlikni oshirishga alohida e’tibor qaratildi.

 

Joriy yilning o‘tgan davri mobaynida vazirlikning tegishli buyruqlari asosida “O‘zbekkonsert” davlat muassasasi, “O‘zbekiston davlat filarmoniyasi” va uning hududiy bo‘limlarida, Qoraqalpog‘iston Respublikasi Madaniyat vazirligi, Xorazm, Buxoro, Surxondaryo, Qashqadaryo, Navoiy,  Samarqand viloyatlari madaniyat boshqarmasi va tizim tashkilotlari faoliyatida  korrupsiyaga qarshi kurashish ishlari samaradorligi yuzasidan o‘rganish olib borildi.

 

O‘tkazilgan o‘rganish jarayonida tashkilotlar tomonidan yo‘l qo‘yilgan kamchiliklarni bartaraf etish bo‘yicha tegishli ko‘rsatmalar berildi.

 

O‘rganish natijalari bo‘yicha “O‘zbekkonsert” davlat muassasasi, “O‘zbekiston davlat filarmoniyasi” va uning hududiy bo‘limlari bilan bevosita hamda ZOOM platformasi orqali, shuningdek, Qoraqalpog‘iston Respublikasi Madaniyat vazirligi, Xorazm, Buxoro, Surxondaryo, Qashqadaryo, Navoiy,  Samarqand viloyatlari madaniyat boshqarmalari va ular tasarrufidagi tashkilotlar xodimlari ishtirokida yig‘ilishlar o‘tkazildi. Mazkur yig‘ilishlarda huquqni muhofaza qiluvchi tashkilotlar xodimlari ishtiroki ta’minlandi.

 

Bundan tashqari, vazirlik Korrupsiyaga qarshi kurashish xizmati va tegishli mutaxassislar ishtirokida davlat xaridlariga oid qonunbuzilishi holatlari yuzasidan  Sirdaryo viloyati Oqoltin tumani madaniyat bo‘limi, Urganch ixtisoslashtirilgan maqom san’ati maktab-internati, Qo‘qon shahar 7-son bolalar musiqa va san’at maktabi, Konimex tumani madaniyat bo‘limi, Shahrisabz shahar 20-son bolalar musiqa va san’at maktabida 6 ta xizmat tekshiruvi o‘tkazildi hamda o‘rganish yakunlariga asosan O‘zbekiston Respublikasi Mehnat kodeksining tegishli moddalariga muvofiq 9 ta holatda mutasaddi xodimlarga qonunchilikda belgilangan tartibda ta’sirchan choralar qo‘llanildi.

 

Olib borilgan targ‘ibot va ogohlantirishlarga qaramay, qonunchilikda belgilangan talablarga rioya etmagan 10 nafar mas’ul rahbar hamda mansabdor shaxslar bilan tuzilgan mehnat shartnomalari bekor qilindi, 9 nafariga esa “hayfsan” intizomiy jazo chorasi qo‘llanildi.

 

Joriy yilning o‘tgan 9 oyi davomida jismoniy va yuridik shaxs vakillari tomonidan Madaniyat vazirligiga korrupsiyaga oid jami 11 ta murojaat kelib tushdi. Barcha murojaatlar tegishli mutaxassislar ishtirokida o‘rganib chiqilib, ariza mualliflariga javob xatlari yuborildi.

 

O‘zbekiston Respublikasi Prezidentining “Manfaatlar to‘qnashuvi to‘g‘risida”gi Qonuni ijrosini samarali tashkil etish chora-tadbirlari to‘g‘risida” 2024-yil 5-iyundagi PQ–210-son qarori ijrosini ta’minlash maqsadida Madaniyat vazirligi va uning barcha tizim tashkilotlarida “Manfaatlar to‘qnashuvi” holatlariga yo‘l qo‘yilmasligi yuzasidan ishlar nazoratga olingan.

 

Madaniyat vazirligi tomonidan korrupsiyani oldini olish va unga qarshi kurash ishlari bundan keyin ham jadal olib boriladi.