O‘zbekiston Prezidentining “Opera va balet san’atini yanada rivojlantirish chora-tadbirlari to‘g‘risida”gi PQ–64-son qaroriga asosan milliy opera va balet san’atini jahon miqyosida keng targ‘ib etish, ilg‘or xorijiy tajribalarni o‘rganish hamda madaniy aloqalarni yanada kengaytirish maqsadida, Alisher Navoiy nomidagi O‘zbekiston davlat akademik katta teatri jamoasining xorijiy davlatlarga gastrol safarlarini tashkil etish belgilangan bo‘lib, ayni kunlarda (3–5-oktyabr kunlari) Turkiyaning Istanbul va Bursa shaharlarida mashhur kompozitor, pianinochi va dirijyor Igor Stravinskiyning “Muqaddas bahor” baleti hamda katta teatrning yetakchi opera va balet solistlari ishtirokida o‘zbek kompozitorlar va jahonga mashhur bo‘lgan kompozitorlarning katta Gala-konsert namoyishini tashkil etish rejalashtirilgan.

 O‘zbekiston Prezidentining PQ–64-son qaroriga asosan, Alisher Navoiy nomidagi O‘zbekiston davlat akademik katta teatri 2022 — 2026-yillarga mo‘ljallangan rejaga binoan 2022-yildan buyon xorijiy gastrol safarlarini tashkil etib kelmoqda. Jumladan, 2022-yilda Koreya Respublikasining Tegu, Pusan, Kochang, Pxyontxek shaharlari bo‘ylab hamda Ozarbayjon Respublikasi Boku shahrida, shuningdek, 2023-yilda Xitoy Xalq Respublikasining Pekin shahrida, Rossiyada, Qozog‘iston Respublikasining Astana shahrida, Belarus Respublikasining Minsk shahrida hamda 2024-yilning 13-14-mart kunlari Qirg‘iz Respublikasining Bishkek shahrida xorijiy gastrol safarlari amalga oshirildi.

2024-yilda Qirg‘iziston, Turkiya va Italiya Respublikalariga xorijiy gastrol safarlari rejalashtirilgan bo‘lib, ayni kunlarda ikkinchi xorijiy gastrol safari  Turkiyada bo‘lib o‘tmoqda. Unda Alisher Navoiy nomidagi O‘zbekiston davlat akademik katta teatrining 130 nafarga yaqin xodimlari ishtirok etishmoqda.

Shu munosabat bilan, 3-oktyabr kuni (Turkiya vaqti bilan soat 19-00da) Istanbulning Mustafa Kamol Otaturk madaniyat markazida hamda 5-oktyabr kuni (Turkiya vaqti bilan soat 19-00da) Bursa shahridagi Madaniyat markazida mashhur kompozitor, pianinochi va dirijyor Igor Stravinskiyning “Muqaddas bahor” baleti hamda teatrning yetakchi opera va balet solistlari ishtirokida katta Gala-konsert namoyishi bo‘lib o‘tadi.

Shuningdek, joriy yilning 13-aprelidan 10-noyabriga qadar  Turkiyaning 16 ta (Adana, Shanliurfa, Bursa, Samsun, Trabzon, Furgon, Nevshehir, Erzurum, Chanakale, Gastroantep, Anqara, Konya, Istambul, Diyarbakir, Izmir, Antalya) hududida bo‘lib o‘tayotgan “Türkiye Kültür Yolu Festivali” Xalqaro san’at festivali doirasida Alisher Navoiy nomidagi O‘zbekiston davlat akademik katta teatri ham mehmon jamoa sifatida ishtirok etadi. Dunyoning barcha nuqtalaridagi madaniyat va san’at sohasi vakillarini bir nuqtada birlashtirgan ushbu san’at festivalida dunyoning mashhur madaniyat va san’at namoyandalari ishtirok etishmoqda. Bu kabi nufuzli festivalda ishtirok etishdan maqsad, o‘zbek san’atini va madaniyatini namoyish etishdan iboratdir.  

 

“Alisher Navoiy nomidagi O'zbekiston davlat akademik katta teatri jamoasi “Türkiye Kültür Yolu Festivali” Xalqaro san’at festivalida doirasida mehmon sifatida ishtirok etmoqda. Shu o'rinda aytib o'tish joyizki, mazkur festivalda ishtirok etish uchun arizalar ikki yil oldindan topshirilib, bir yarim yil oldin festival dasturi tasdiqlanadi. Shunga qaramay, biz ikki oy avval teatrning gastrol safari doirasidagi namoyishlarini festival dasturiga kiritishga erishdik, yana bir quvonchli xabarni ta’kidlamoqchiman, jahonga mashhur bo'lgan teatrlardan Rossiya xalq artisti Valeriy Gergiyev boshchiligida "Mariinskiy" teatri, Germaniyaning “Deuche Opera Berlin” teatri, Angliyaning “Royal Opera Hous” teatrlari qatorida aynan bizning Alisher Navoiy nomidagi O‘zbekiston davlat akademik katta teatri qatnashishining o‘zi O‘zbekiston va o’zbek san’ati uchun juda katta faxr hisoblanadi, shuningdek, ushbu tashrif davomida 2025-yilda Turkiyada bo‘lib o‘tadigan jahonga mashhur Xalqaro Aspendos opera va balet festivaliga ishtirok etish bo‘yicha kelishuvlarga erishildi”, - deydi O‘zbekiston xalq artisti, Alisher Navoiy nomidagi O'zbekiston davlat akademik katta teatri direktori Ramiz Usmonov.

 

Bugungi kunga (13-aprelidan buyon) qadar Turkiyaning 12 ta (Adana, Shanliurfa, Bursa, Samsun, Trabzon, Furgon, Nevshehir, Erzurum, Chanakale, Gastroantep, Anqara, Konya) hududida o‘tkazilgan ushbu festival ayni kunlarda 13-hududda ya’ni, Turkiyaning Istanbul shahrida 28-sentyabrdan 6-oktyabrga qadar bo‘lib o‘tmoqda.     

Gastrol safari davomida Alisher Navoiy nomidagi O‘zbekiston davlat akademik katta teatri yetakchi solistlari ishtirokida katta Gala-konsert ham bo‘lib o‘tishi rejalashtirilgan bo‘lib, unda teatrning bosh dirijyori, V.Chernuxo-Volich rahbarligida quyidagilar ijro etiladi:

 

1. S. Yudakov - “Xorazm bayram yurishi” A. Navoiy nomidagi Davlat Akademik Katta Teatri simfonik orkestri ijro etadi.

2. T. Sodiqov - "Layli va Majnun" operasidan Layli ariyasi "Ushshoq" Gulnar Aljanova ijro etadi.

3. N.A.Rimskiy-Korsakov - "Shoh qallig'i" operasidan Gryaznoy ariyasi "Hayolimdan ketmas u sohibjamol" Nosir Yusupov ijro etadi.

4. N.A.Rimskiy-Korsakov -  "Shoh qallig'i" operasidan Lyubasha ariyasi "Yo'q, bo'lishi mumkin emas” Anastasiya Yudina tomonidan ijro etiladi.

5. S.Yudakov - "Maysaraning ishi" operasidan Cho‘pon qo'shig'i "Kel so'zlashaylik bir nafas" Rustam Alimardonov ijro etadi.

6. Sh. Guno - "Romeo va Julyetta" operasidan Julyetta valsi “Je vuex vivre...” Navro'za Mamarajabova ijro etadi.

6. Sh. Guno - "Romeo va Julyetta" operasidan Julyetta valsi “Je vuex vivre...” Navro'za Mamarajabova ijro etadi.

7. J. Massne - Verter operasidan Verter ariyasi "Pourquoi me reveiller..." Umid Isroilov ijro etadi

8. J. Rossini - "Sevilya sartaroshi" operasidan Don Bazilio ariyasi "La calunnia e un venticello..." Kamoliddin Muhamadiyev ijro etadi.

9. S. Yudakov - Maysaraning ishi" operasidan Xoji Darg‘a ariyasi “Vasiqasi bor endi...”  Nosir Yusupov ijro etadi.

10. P. I. Chaykovskiy - "Yevgeniy Onegin" operasidan Polonez Alisher Navoyi nomidagi DAKT simfonik orkestri ijro etadi, Bosh dirijyor V. Chernuxo-Volich.

11. J.Verdi - "Bal maskarad" operasidan Ameliya ariyasi "Morro ma prima in gracia..." Gulnar Aljanova ijro etadi.

12. J. Verdi "Bal Maskarad" operasidan Renato ariyasi "Eri tu..."

Rahim Mirzakamalov ijro etadi.

13. J.Verdi - "Rigoletto" operasidagi "La donna e Mobile" qo'shig'i Rustam Alimardonov ijro etadi.

14. S. Yudakov - "Maysaraning ishi" operasidan Mulla Do'st ariyasi "Kel Dilrabo..."Rahim Mirzakamalov ijro etadi.

15. F. Legar - “Juditta” operettasidan Juditta qo'shig'i "Meine Lippen..."  Nadejda Golender ijro etadi.

16. J. Puchchini "Toska" operasidan Kavaradossi ariyasi  "E lucevan le stelle" Ramiz Usmonov ijro etadi.

17. Turk qo'shig'i

18. J. Verdi - "Traviata" operasidan "Libiamo ne'lieti calici" hamma ishtirokchilar ijro etishadi.

19. S. Yudakov - "Karnaval Valsi" barcha solistlar va xor, orkestr jamoalari ijro etadi.

Ma’lumot uchun, O‘zbekistonda jami 41 ta teatr mavjud bo‘lib, shundan Alisher Navoiy nomidagi O‘zbekiston davlat akademik katta teatri yagona hisoblanib, opera va balet san’atining eng sara milliy va klassik namuna asarlaridan xalqimizni bahramand etib kelmoqda.