O‘zbekiston Respublikasi Madaniyat vazirligi

O‘zbek xalqining milliy o‘zligini, beg‘ubor hazil-mutoyibasi va so‘z zamiridagi chuqur ma’no-mazmunini o‘zida mujassam etgan askiya hamda qiziqchilik san’ati azaldan madaniy hayotimizning ajralmas qismi hisoblanadi. Bugungi kunda ushbu nodir merosni yangicha ruhda rivojlantirish va uni zamonaviy stendap yo‘nalishi bilan uyg‘unlashtirgan holda yosh avlodga yetkazishga alohida e’tibor qaratilmoqda.

Shu maqsadda, “Askiya, qiziqchilik va stendap” ijodiy birlashmasi a’zolari tomonidan o‘zbek xalqining askiya va qiziqchilik an’analarini keng targ‘ib qilish, milliy kulgi san’atining tarixiy va zamonaviy namoyandalarini yosh avlodga tanishtirish, yosh ijodkorlarni har taraflama qo‘llab-quvvatlash hamda poytaxtimiz aholisi va mehmonlarining mazmunli madaniy hordiq chiqarishlarini ta’minlash maqsadida poytaxtimizdagi “Navro‘z bog‘i”ning “Labi hovuz” maydonida “Ochiq osmon ostida” nomli kulgi sayli — madaniy-ma’rifiy tadbiri bo‘lib o‘tdi.

Tadbirda O‘zbekiston Respublikasi Prezidentining madaniyat bo‘yicha vakili Xasan Salixov, madaniyat vazirining birinchi o‘rinbosari Nodirbek Sayfullayev hamda vazir o‘rinbosari Sanjar Bobojonov ishtirok etdi.

O‘zbekiston Respublikasi Madaniyat vazirligi rahbarligi va “O‘zbektelekom” AK hamrahbarligida tashkil etilgan ushbu shodiyona chinakam xalq sayliga aylanib ketdi.

Ochiq osmon ostida o‘tkazilgan tadbirning o‘ziga xos jihatlaridan biri — tomoshabinlar uchun “Labi hovuz” maydoniga olib kiruvchi yo‘lakda maxsus ko‘rgazmali kompozitsiya tashkil etilganligida bo‘ldi. Unda o‘zbek askiyasi, qiziqchiligi va zamonaviy stendap san’atining shakllanish hamda rivojlanish tarixi bosqichma-bosqich davrlashtirilib, tashrif buyuruvchilarga ma’rifiy manba sifatida namoyish qilindi.

Sayl doirasida yosh iqtidorlarni kashf etishga qaratilgan "Ochiq mikrofon" kechasi ham o‘tkazildi. Unda askiya, qiziqchilik va stendap san’atiga qiziquvchi izlanuvchan yosh ijodkorlar ilk bor shunday muhtasham va gavjum maydonda o‘z mahoratlarini sinovdan o‘tkazib, tomoshabinlar e’tirofiga sazovor bo‘ldilar.

Tadbirning asosiy qismi bo‘lmish tantanali Gala konsert dasturida el suygan taniqli so‘z ustalari, tajribali askiyachilar hamda stendap ijrochilarining ketma-ket chiqishlari yig‘ilganlarga behad quvonch va unutilmas taassurotlar ulashdi. Sahnada Mirzabek Xolmedov, Boltaboy Toshmatov, Valijon Shamshiyev, Avaz Oxun, Abdurahmon qiziq, Elmurod Haqnazarov, Abror shovvoz, Elbek Shukuriy, Mirshakar, “Qahqaha” jamoasi, "Qo‘shnilar" guruhi, G‘ulom shov-shuv hamda Satira teatri ijodiy jamoasi, shuningdek, Farg‘ona, Andijon va Toshkent askiyachilar guruhlari bir-biridan jozibali payrovlar, o‘tkir va samimiy hazillar bilan yig‘ilganlar kayfiyatini yuqori bosqichga ko‘tardilar. Shuningdek, "O‘zbektelekom" AK tomonidan tadbirga tashrif buyurgan muxlislar uchun o‘tkazilgan interaktiv va quvnoq o‘yinlar, qimmatbaho sovg‘alari kulgi sayliga o‘zgacha ko‘tarinkilik bag‘ishladi.

Zero, bugungi yutuqlarning zamirida buyuk ustozlarning munosib mehnati va boy tajribasi yotadi. Gala konsert dasturida milliy kulgi san’atimizning yetuk namoyandalari xotirasiga alohida e’tibor qaratildi. Ustoz san’atkorlar — Rustam Hamroqulov, Hojiboy Tojiboyev, Obid Asomov, Mamasiddiq Shirayev hamda Bahodirjon Shokirovlarning yorqin xotiralari, ularning o‘zbek san’atiga qo‘shgan beqiyos hissalari ehtirom bilan yodga olindi.

San’at va kulgi bayrami yakunida barcha ishtirokchi ijodkorlar jam bo‘lib, “Askiya, qiziqchilik va stendap” ijodiy birlashmasining chorlov va birdamlik madhiyasi hisoblangan “Keling do‘stlar Birlashmamizga” nomli yangi qo‘shiqni ilk bor birgalikda premyera qildilar. Ochiq osmon ostida o‘tkazilgan ushbu fayzli oqshom barcha tomoshabinlar va qatnashchilar qalbidan chuqur joy olib, milliy so‘z san’atimizning boqiy va navqiron ekanligini yana bir bor namoyish etdi.