Bugun, 26-sentyabr kuni madaniyat vaziri Ozodbek Nazarbekov boshchiligida kun tartibidagi bir necha masalalar yuzasidan tanqidiy yig'ilish bo'lib o'tdi.

Yig'ilishda madaniyat vaziri o'rinbosari Yusufjon Usmonov, vazirlikning tegishli markaziy apparati vakillari hamda onlayn tartibda hududiy tizim tashkilot rahbarlari ishtirok etishdi.

Kun tartibida quyidagi masalalar muhokama etildi:

-Namunaviy madaniyat markazlari tashkil etish;
-Davlat-xususiy sheriklikka berish;
-Energiya resurslaridan oqilona foydalanish samaradorligini oshirish.

"Barchangizga ma’lum Davlatimiz rahbari madaniyat sohasiga alohida e’tibor bermoqdalar. Bizning sohamizni rivojlantirish va soha vakillarini qo‘llab-quvvatlash bo‘yicha islohotlar olib borilmoqda. Biroq, ba'zi hududiy rahbarlar haligacha biz ko‘zlagan maqsadlarni tushunmayotganligi, dunyoqarashini o‘zgartirmayotganligi achinarli hol. Bunga birgina misol sifatida Prezidentimizning 2023-yil 22-dekabr kuni o‘tkazgan yig‘ilishlarida har bir tuman va shaharda ta’mirtalab madaniyat markazlarini namunaviy shaklda qayta yo‘lga qo‘yish bo‘yicha topshiriq berilgan edi. Ammo, ming afsuski, bu ajoyib imkoniyatdan foydalanilmay kelinayotganligi - Jizzax, Surxondaryo, Namangan, Xorazm, Toshkent viloyatlari misolida qayd etishim lozim", 
- dedi Ozodbek Nazarbekov. 

Yig'ilish davomida kun tartibidagi masalalar yuzasidan amalga oshirilgan ishlar hisoboti har bir hudud bo'yicha tinglandi va natijalari tahlil etildi, sustkashlikka yo'l qo'ygan hududlar ogohlantirilib, 9 oy davomida qilingan ishlar sarhisobi vazirlikka taqdim etilishi yuzasidan ko'rsatmalar berildi.