Rossiya Federatsiyasida o‘tkazilayotgan "O‘zbekiston madaniyati kunlari" doirasida O‘zbekiston Respublikasining Rossiya Federatsiyasidagi Elchixonasida vatandoshlar bilan uchrashuv bo‘lib o‘tdi. Uchrashuvda O‘zbekiston Respublikasi madaniyat vaziri Ozodbek Nazarbekov, O‘zbekiston Respublikasining Rossiya Federatsiyasidagi Favqulodda va Muxtor Elchisi Botirjon Asadov ishtirok etib, Rossiyada ta’lim olayotgan o‘zbekistonlik yoshlar hamda turli sohalarda mehnat qilayotgan yurtdoshlar bilan ochiq muloqot qildi.
 

Suhbat davomida vatandoshlarning Rossiyadagi hayoti, ta’lim va mehnat faoliyati, ularni qo‘llab-quvvatlash, shuningdek, O‘zbekiston bilan aloqalarini yanada mustahkamlash masalalari yuzasidan fikr almashildi. Muloqotda xorijda tahsil olayotgan yoshlarning milliy o‘zligini asrab-avaylashi, ona tili, milliy urf-odat va an’analarga hurmat ruhida kamol topishiga alohida e’tibor qaratildi. Shuningdek, yoshlarning O‘zbekiston madaniyati va san’atini Rossiyada keng targ‘ib etishdagi ishtiroki muhim ekani ta’kidlandi.

Rossiyada mehnat qilayotgan vatandoshlarning taklif va mulohazalari ham tinglandi. Ular bilan O‘zbekistonning bugungi madaniy hayoti, sohada amalga oshirilayotgan islohotlar, yangi loyihalar va madaniy-ma’rifiy tashabbuslar haqida fikr almashildi. Uchrashuvda vatandoshlar bilan madaniy aloqalarni yanada kengaytirish, ularni O‘zbekistondagi madaniy jarayonlarga jalb etish, shuningdek, xorijda milliy madaniyatimiz va san’atimizni targ‘ib qilishga qaratilgan tashabbuslarni qo‘llab-quvvatlash masalalariga ham e’tibor qaratildi.
 

"O‘zbekiston madaniyati kunlari" doirasida tashkil etilgan mazkur uchrashuv Rossiyada yashayotgan vatandoshlar bilan bevosita muloqot qilish, ularning fikr va takliflarini eshitish hamda yurt bilan ma’naviy-madaniy aloqalarini yanada mustahkamlashga xizmat qildi.
 

Uchrashuv samimiy muloqot va ochiq fikr almashinuvi ruhida o‘tdi.


Eslatib o‘tamiz, bugun, 5-oktyabr kuni Moskva shahridagi Davlat Kreml saroyida "O‘zbekiston madaniyati kunlari" doirasida mamlakatimiz davlat mustaqilligining 35 yilligiga bag‘ishlangan “Yangi O‘zbekiston shu’lasi” tantanali konserti bo‘lib o‘tadi.