Ayni kunlarda Madaniyat vazirligi tashabbusi bilan yurtimizning turli hududlarida istiqomat qilayotgan, san’at va musiqaga qiziqishi baland ko‘plab iste’dodli yoshlarni kashf etish maqsadida, "Yangi O‘zbekiston iste’dodlari" ko‘rik-tanloviga start berilgan bo'lib, hududlarda bosqichma-bosqich o'tkazilib kelinmoqda.  

Kuni kecha mazkur tanlovning viloyat bosqichida ham yosh iqtidor sohiblari 10 ta yo‘nalish bo‘yicha qatnashib, an’anaviy cholg‘uchilik, akademik xonandalik, estrada xonandaligi, an‘anaviy va estrada cholg‘u ijrochiligi, suxandonlik va shu kabi yo‘nalishlarda bor mahoratlarini namoyon etishdi. 

Bunda ishtirokchilar hakamlar hay’ati tomonidan munosib baholanib, g‘oliblikni qo‘lga kiritganlar "Yangi O‘zbekiston iste’dodlari" ko‘rik-tanlovining Respublika bosqichiga yo‘l olishdi.

Ma'lumot o'rnida, tanlovning asosiy maqsadi madaniyat va san’at sohasida faoliyat yuritayotgan 18 yoshdan 35 yoshgacha bo‘lgan ijodkorlarni kashf etish, ularning ijro mahorati, iste’dodi va qobiliyatini namoyon etish, ijrochilik ko‘nikmalarini yanada rivojlantirish, yosh ijodkorlar ishtirokida milliy san’atimizni dunyo sahnalariga olib chiqish, iqtidorli yoshlarni rag‘batlantirish hamda ularning ijodini keng targ‘ib qilish, o‘ziga xos xususiyatlari bilan ommani tanishtirishdan iboratdir.