Xorazm viloyatida madaniyat va san’at sohasida amalga oshirilayotgan ishlar, yaratilgan zamonaviy sharoitlar hamda ijodiy jamoalar faoliyatini keng jamoatchilikka yetkazish maqsadida tashkil etilgan press-tur o‘z yakuniga yetdi. Press-tur davomida ommaviy axborot vositalari vakillari viloyatdagi qator madaniyat va san’at muassasalari faoliyati bilan yaqindan tanishdilar. Jurnalistlar va blogerlarga yangi barpo etilgan binolar, rekonstruksiya qilingan ob’yektlar, zamonaviy moddiy-texnik baza, ta’lim va ijodiy jarayonlar hamda aholiga ko‘rsatilayotgan madaniy xizmatlar bevosita joyiga chiqqan holda namoyish etildi.

Press-turning navbatdagi manzili Xiva shahar 41-son markaziy madaniyat markazi bo‘ldi. Qadimiy va betakror Xiva shahrida joylashgan mazkur markaz uzoq yillar davomida ijaradagi binoda faoliyat yuritgan bo‘lsa, bugun zamonaviy talablarga javob beradigan yangi binoga ega bo‘ldi. Markazda 400 o‘rinli zamonaviy konsert zali, ijodiy jamoalar va turli yo‘nalishdagi to‘garaklar faoliyatini tashkil etish uchun zarur xonalar va sharoitlar yaratilgan. Bu imkoniyatlar aholining madaniy hordig‘ini mazmunli tashkil etish, yoshlarni san’atga keng jalb qilish hamda ijodkorlarni qo‘llab-quvvatlashga xizmat qilmoqda.

Press-turning yakuniy manzili esa Xorazm viloyati qo‘g‘irchoq teatri bo‘ldi. OAV vakillariga teatrning sahna ortidagi faoliyati, spektakllarni tayyorlash jarayonlari, qo‘g‘irchoqlar, dekoratsiya va rekvizitlarni yaratish ishlari, shuningdek, ijodiy jamoaning sahna mashg‘ulotlari namoyish etildi. Teatrning yangi binosi qurilishi uchun 13 milliard so‘m mablag‘ yo‘naltirilib, 160 o‘rinli zamonaviy tomosha zali barpo etilgan. Shuningdek, 80 nafar xodim faoliyat yuritadigan ijodiy jamoa uchun zarur shart-sharoitlar yaratilgan.

Ayni paytda teatr repertuaridan 118 ta spektakl o‘rin olgan. Ijodiy jamoa Germaniya, Buyuk Britaniya, Rossiya, Xitoy, Turkiya va Ozarbayjon kabi davlatlarda gastrol safarlarida ishtirok etgan hamda qator xalqaro festivallarda o‘z ijodiy dasturlari bilan qatnashgan. Umuman, press-tur davomida madaniyat va san’at sohasida amalga oshirilayotgan yangilanishlar, zamonaviy infratuzilmaning yaratilishi, yosh iste’dodlarni qo‘llab-quvvatlash, milliy san’at an’analarini asrab-avaylash va ijodiy jamoalar faoliyatini rivojlantirish borasidagi ishlar keng namoyish etildi.

Press-tur jurnalistlar va blogerlarga sohadagi o‘zgarishlarni bevosita joyiga chiqqan holda o‘rganish, ijodiy jarayonlar bilan tanishish hamda yaratilgan imkoniyatlarni keng jamoatchilikka yetkazish uchun samarali muloqot maydoni bo‘ldi. Shu bilan Xorazm viloyatida madaniyat va san’at sohasida amalga oshirilgan ishlarni keng targ‘ib qilish maqsadida tashkil etilgan press-tur o‘z yakuniga yetdi.