Avval xabar berilganidek, Qoraqalpog‘iston Respublikasidagi press-tur davom etmoqda. Press-turning navbatdagi manzili Qoraqalpog‘iston kino san’ati tarixida alohida o‘ringa ega bo‘lgan “Qoraqalpoqfilm” davlat muassasasi bo‘ldi. Tashrif davomida kinolentalar yaratish jarayoni, studiyaning bugungi faoliyati, moddiy-texnik bazasi hamda milliy kino san’atini rivojlantirish borasida amalga oshirilayotgan ishlar bilan tanishildi.

1970-yil 1-aprel kuni tashkil etilgan “Qoraqalpoqfilm” shu kunga qadar 500 dan ortiq animasion, hujjatli va badiiy filmlar yaratgan. Bugungi kunda esa studiya faoliyatini zamonaviy talablar asosida rivojlantirish, yangi avlod kino mahsulotlarini yaratish, ayniqsa, yoshlar va bolalar uchun mazmunli hamda sifatli audiovizual kontent tayyorlashga alohida e’tibor qaratilmoqda.

So‘nggi yillarda kinolavha yaratish uchun zarur infratuzilmani mustahkamlash borasida ham salmoqli ishlar amalga oshirildi. Hukumatning tegishli qaroriga asosan 4,5 milliard so‘m mablag‘ hisobidan kinostudiya binosi rekonstruksiya qilinib, zamonaviy ko‘rinishga keltirildi.

Kinostudiyaning ijodiy salohiyatini namoyon etuvchi muhim loyihalardan biri — buyuk qoraqalpoq shoiri va mutafakkiri Ajiniyoz Qo‘siboy o‘g‘lining hayoti va ijodiy merosiga bag‘ishlangan “Ajiniyoz” badiiy-publisistik filmi bo‘ldi.

O‘zbekiston Respublikasi Prezidentining 2024-yil 16-iyuldagi “Atoqli qoraqalpoq shoiri va mutafakkiri Ajiniyoz Qo‘siboy o‘g‘li tavalludining 200 yilligini keng nishonlash to‘g‘risida”gi PQ-258-son qarori asosida ishlab chiqarilgan filmning umumiy smeta qiymati 3 milliard so‘mni tashkil etdi.

Film suratga olish ishlari 2024 yilda bo‘lib o‘tdi. “Ajiniyoz” filmining premyerasi 2024-yil 16-noyabr kuni Qoraqalpog‘iston san’at saroyida, 19-noyabr kuni esa Toshkent shahridagi O‘zbekiston milliy kino san’ati saroyida o‘tkazildi. Film 2024-yil 26-dekabr kuni bo‘lib o‘tgan “Oltin Humo-2024” tanlovida “Eng yaxshi rassom ishi” nominatsiyasi g‘olibi deb topildi.

Kinostudiya tomonidan 2025-yilda suratga olingan “Qoravoy” badiiy filmi ham ijodiy jamoaning so‘nggi yillardagi muhim ishlaridan biri bo‘ldi. Umumiy smeta qiymati 2,4 milliard so‘mni tashkil etgan mazkur film dastlab Qoraqalpog‘iston san’at saroyida, 2026-yil 1-mart kuni esa Toshkent shahridagi O‘zbekiston milliy kino san’ati saroyida namoyish etildi. Shu yil 15-may kuni filmning o‘zbek tiliga dublyaj qilingan versiyasi premyerasi ham o‘tkazildi.

“Qoraqalpoqfilm” faoliyatida kino san’atini aholi, ayniqsa, yoshlar orasida yanada ommalashtirishga ham alohida e’tibor qaratilmoqda. Shu maqsadda kinostudiya qoshida 100 tomoshabinga mo‘ljallangan zamonaviy kinoteatr tashkil etish ishlari olib borilmoqda.

Bolalar uchun sifatli va mazmunli kontent yaratish esa studiyaning ustuvor yo‘nalishlaridan biriga aylanmoqda. Jumladan, bolalarga mo‘ljallangan “Orol” multseriali tayyorlanib, uning 2 qismi namoyish etildi. Jami 3 qismdan iborat multserial orqali bolalar auditoriyasiga qiziqarli va tarbiyaviy mazmundagi kontent taqdim etish maqsad qilingan.

Shuningdek, homiylik mablag‘lari hisobidan bolalar uchun “Tulkishek” hajviy kino jurnali­ning 25 ta soni suratga olindi. “Kinopodkast” loyihasining joriy yildagi 3-soni ham tayyorlanib, ommaviy axborot vositalari orqali keng jamoatchilikka taqdim etildi.

Bolalar uchun yanada qiziqarli va ko‘ngilochar kontent yaratish maqsadida “Qiziq Kids” loyihasi ham yo‘lga qo‘yildi. Bugungi kunga qadar mazkur loyihaning 3 ta soni suratga olindi.

Umuman, “Qoraqalpoqfilm”da amalga oshirilayotgan ishlar birgina kino mahsulotlari ishlab chiqarish bilan cheklanib qolmayapti. Kinostudiyaning moddiy-texnik bazasini zamonaviylashtirish, milliy kino mahsulotlarini yaratish, tarixiy va madaniy merosimizni ekran san’ati orqali keng targ‘ib qilish, bolalar va yoshlar uchun sifatli audiovizual kontent tayyorlash borasida tizimli ishlar olib borilmoqda.

Kino — bu nafaqat ekrandagi tasvir, balki xalqning tarixi, xotirasi, milliy ruhi va bugungi hayotini kelajak avlodlarga yetkazadigan muhim san’at turidir. “Qoraqalpoqfilm”da yaratilayotgan har bir yangi asar esa Qoraqalpog‘istonning boy tarixi va madaniyatini zamonaviy kino tilida ifodalash, milliy ekran san’atini yangi bosqichga olib chiqish yo‘lidagi muhim qadam bo‘lib xizmat qilmoqda.