Qoraqalpog‘iston Respublikasida o‘tkazilayotgan press-tur doirasida navbatdagi manzil O‘zbekiston davlat konservatoriyasining Nukus filiali bo‘ldi. Tadbirda O‘zbekiston Respublikasi madaniyat vaziri Ozodbek Nazarbekov ishtirok etib, filialning faoliyati, ta’lim jarayoni hamda talabalar va professor-o‘qituvchilar uchun yaratilgan shart-sharoitlar bilan tanishdi. Press-tur davomida hududda amalga oshirilayotgan ishlar, madaniyat va san’at sohasidagi yangilanishlar haqida Qoraqalpog‘iston Respublikasi madaniyat vaziri Begisbay Temirbayev ma’lumot berib bormoqda.

O‘zbekiston davlat konservatoriyasining Nukus filiali Qoraqalpog‘iston Respublikasida musiqa ta’limini rivojlantirish, yuqori malakali mutaxassislar tayyorlash hamda yoshlarning musiqiy salohiyatini yuksaltirish maqsadida tashkil etilgan. Filial O‘zbekiston Respublikasi Prezidenti Shavkat Mirziyoyevning 2020-yil 2-oktyabr kuni Qoraqalpog‘iston Respublikasiga tashrifi davomida Qoraqalpog‘iston Respublikasi Jo‘qorg‘i Kengesining navbatdan tashqari sakkizinchi sessiyasida berilgan topshiriqlar ijrosini ta’minlash maqsadida, Vazirlar Mahkamasining 2021-yil 5-apreldagi 186-son qarori asosida tashkil etilgan.

Bugungi kunda filial uchun zamonaviy infratuzilma yaratilgan. Umumiy smeta qiymati 27 milliard so‘m bo‘lgan 300 o‘rinli yangi o‘quv binosi, 200 o‘rinli o‘quv-mashg‘ulot zali barpo etildi. Shuningdek, mavjud ma’muriy bino mukammal ta’mirlandi. Mazkur obyektlar 2025/2026 o‘quv yilida professor-o‘qituvchilar va talabalar ixtiyoriga topshirildi. 2025-yil sentyabr oyidan boshlab filial o‘z faoliyatini yangi binoda davom ettirmoqda.

Tadbir davomida filialning moddiy-texnik bazasini yanada mustahkamlash borasida amalga oshirilayotgan ishlarga ham alohida e’tibor qaratildi. Filialning musiqa cholg‘ulari bilan ta’minlanganlik darajasini oshirish maqsadida Vazirlar Mahkamasining tegishli farmoyishi asosida Iqtisodiyot va moliya vazirligi, Madaniyat vazirligi, Oliy ta’lim, fan va innovatsiyalar vazirligi hamda "Mahalla" xayriya jamoat fondi mablag‘lari hisobidan jami 8 milliard 558 million so‘m mablag‘ ajratilgan. Ushbu mablag‘lar hisobidan 20 ta fortepiano va 10 ta royal xarid qilindi. Hozirda xarid qilingan barcha 30 ta musiqa cholg‘usi filialga to‘liq yetkazib berilgan bo‘lib, talabalar tomonidan o‘quv jarayonida samarali foydalanilmoqda.

Yangi o‘quv binosi va zamonaviy musiqa cholg‘ularining foydalanishga topshirilishi ta’lim jarayonini sifatli tashkil etish, talabalarning amaliy ko‘nikmalarini rivojlantirish hamda professional musiqa ta’limi uchun zarur shart-sharoitlarni yaratish imkonini bermoqda. Bu esa Qoraqalpog‘istonda musiqa ta’limi taraqqiyoti, iqtidorli yoshlarni qo‘llab-quvvatlash va milliy san’atimiz uchun yuqori malakali mutaxassislar tayyorlashda muhim ahamiyat kasb etadi.