O‘zbekiston Respublikasi Madaniyat vazirligi

Joriy yilning 24–26-sentabr kunlari Rossiya Federatsiyasining Sankt-Peterburg shahrida XII Xalqaro birlashgan madaniyatlar forumi bo‘lib o‘tdi. Nufuzli xalqaro tadbirda O‘zbekiston Respublikasi Madaniyat vazirining birinchi o‘rinbosari Nodirbek Sayfullayev boshchiligidagi delegatsiya ishtirok etib, forum doirasida tashkil etilgan qator tadbirlarda mamlakatimizning madaniyat va kino sohasidagi hamkorlikka oid pozitsiyalari taqdim etildi.

Xususan, 25-sentyabr kuni forum doirasida "MDH mamlakatlarining yagona kino makonini yaratish mexanizmlari" mavzusidagi sessiya bo‘lib o‘tdi. Unda Rossiya Federatsiyasi Prezidentining xalqaro madaniy hamkorlik bo‘yicha maxsus vakili Mixail Shvidkoy, Rossiya Federatsiyasi Madaniyat vaziri Olga Lyubimova, Moskva hukumati vaziri Aleksey Fursin, shuningdek, Qozog‘iston, Tojikiston va Belarus Respublikasi madaniyat vazirliklari rahbarlari ishtirok etdi. Sessiyada so‘zga chiqqan Nodirbek Sayfullayev MDH davlatlari o‘rtasida kino sohasidagi hamkorlikni yangi bosqichga olib chiqish muhimligini ta’kidladi.

Jumladan, yagona kino makonini shakllantirish, qo‘shma filmlar ishlab chiqarish, kino kunlari va festivallar almashinuvini kengaytirish, milliy kinolarni MDH mamlakatlarida keng namoyish etish va targ‘ib qilish mexanizmlarini takomillashtirish masalalariga e’tibor qaratildi.

Shuningdek, kino ta’limi va malakali mutaxassislar tayyorlash tizimini rivojlantirish, yosh rejissyor va prodyuserlarni qo‘llab-quvvatlash, ijodiy laboratoriyalar, mahorat darslari hamda qo‘shma loyihalarni yo‘lga qo‘yish borasidagi takliflar bildirildi.

Ta’kidlanganidek, kino — nafaqat san’at, balki xalqlar o‘rtasidagi madaniy muloqotni mustahkamlovchi muhim vositalardan biridir. Shu bois MDH davlatlari o‘rtasida kinematografiya sohasidagi hamkorlikni kengaytirish mamlakatlar o‘rtasidagi madaniy aloqalarni yanada mustahkamlashga xizmat qiladi.

Shuningdek, Nodirbek Sayfullayev boshchiligidagi O‘zbekiston delegatsiyasi Marinskiy teatr-majmuasida Rossiya Federatsiyasi Prezidenti Vladimir Putin ishtirokida o‘tkazilgan forumning yalpi (plenar) sessiyasida ham qatnashdi.

Plenar sessiyada xalqaro madaniy hamkorlikning bugungi holati va istiqbollari, madaniyatlararo muloqotni yanada rivojlantirish, mamlakatlar o‘rtasida tajriba va yangi g‘oyalar almashinuvini kengaytirish masalalariga e’tibor qaratildi. Rossiya Federatsiyasi Prezidenti forum ishtirokchilariga minnatdorlik bildirib, bunday nufuzli xalqaro tadbirlar madaniyatlararo muloqot, o‘zaro tajriba va yangi g‘oyalar almashinuvi uchun muhim platforma bo‘lib xizmat qilishini ta’kidladi.

Forum doirasidagi uchrashuv va muloqotlar O‘zbekistonning xalqaro madaniy hamkorlik geografiyasini kengaytirish, xususan, MDH davlatlari bilan kino va madaniyat sohalaridagi aloqalarni yangi mazmun bilan boyitishga qaratilgan amaliy muloqotlarni davom ettirish uchun muhim ahamiyat kasb etdi.