"Brigada" filmining bosh qahramoni, Rossiya xalq artisti Sergey Bezrukov O‘zbekiston madaniyat vazirligiga tashrif buyurdi
2024-09-23 17:25:00 / Yangiliklar
Bugun, 23-sentyabr kuni O‘zbekiston madaniyat vazirining birinchi o‘rinbosari Avazxon Tadjixanov hamda Moskva Gubern teatri badiiy rahbari, Rossiya xalq artisti Sergey Bezrukov o‘rtasida hamkorlik uchrashuvi bo‘lib o‘tdi.
Uchrashuv avvalida ikki davlat o‘rtasidagi madaniy hamkorlik borasida olib borilayotgan ijobiy ishlar haqida suhbatlashildi.
Uchrashuv davomida,
Rossiyaning Gubern teatrida O‘zbekistonning yirik teatrlari vakillari ishtirokida milliy urf-odat va an’analarni o‘zida aks ettirgan teatr namoyishlarini tashkil etish va O‘zbekistonda Rossiya Gubern teatri vakillari ishtirokidagi namoyishlarni muntazam tashkil etish;
O‘zbekiston va Rossiya filmlarida suratga tushgan aktyorlar, ikki davlatda o‘zining obro‘siga ega mashhur san’atkorlar ishtirokida “Yulduz bilan uchrashuv” loyihasini tashkil etish va mahalliy OAV orqali yoritish;
Rossiyaning Gubern teatri va O‘zbekistonning yirik teatrlari o‘rtasida hamkorlik dasturini imzolash;
Ikki davlatning yirik shaharlariga teatr jamoalarining gastrol safarlarini hamkorlik asosida amalga oshirish kabi masalalar ko‘rib chiqildi.
Shuningdek, uchrashuvda Avazxon Tadjixanov Toshkent shahar hokimi o‘rinbosari Sanjar Tadjiev bilan birgalikda poytaxtimizda rus lirik shoiri va yozuvchisi Sergey Yeseninning 130 yilligiga bag'ishlangan yodgorlik o‘rnatish masalalari muhokama qilindi. Mazkur masala yuzasidan Toshkent shahar hokimligi, Madaniyat vazirligi va mutasaddi tashkilotlar bilan hamkorlikda tegishli choralar ko‘rilishiga kelishib olindi.
Uchrashuv yakunida Moskva Gubern teatri badiiy rahbari, Rossiya xalq artisti Sergey Bezrukov O‘zbekiston madaniyat vazirining birinchi o‘rinbosari Avazxon Tadjixanovni bugungi tavallud ayyomi bilan muborakbod etdi.