O‘zbekiston va Rossiya o‘rtasida madaniyat sohasidagi hamkorlik istiqbollari muhokama qilindi
2026-09-25 10:30:00 / Yangiliklar
Joriy yilning 24–26 sentyabr kunlari Rossiya Federatsiyasining Sankt-Peterburg shahrida XII Xalqaro birlashgan madaniyatlar forumi bo‘lib o‘tmoqda.
Forum doirasida O‘zbekiston Respublikasi madaniyat vazirining birinchi o‘rinbosari Nodirbek Sayfullayev hamda Rossiya Federatsiyasi madaniyat vaziri o‘rinbosari Andrey Malishev o‘rtasida uchrashuv bo‘lib o‘tdi.
Muloqot davomida ikki mamlakat o‘rtasida madaniyat va san’at sohasidagi hamkorlikning joriy holati hamda uni yanada rivojlantirish istiqbollari muhokama qilindi.
Xususan, Rossiyaning mashhur teatrlarida sahnalashtirilayotgan spektakllarni O‘zbekistonda namoyish etish, taniqli rus aktyor va aktrisalari ishtirokida mahorat darslarini tashkil etish, shuningdek, ikki davlat teatrlari o‘rtasida qo‘shma loyihalarni yo‘lga qo‘yish masalalariga alohida e’tibor qaratildi.
Shuningdek, madaniyat va san’at sohasida kadrlar tayyorlash hamda ta’lim yo‘nalishidagi hamkorlikni izchil davom ettirish bo‘yicha takliflar bildirildi.
Uchrashuvda joriy yilda Rossiya Federatsiyasida o‘tkazilishi rejalashtirilayotgan "O‘zbekiston madaniyati kunlari" tadbirlariga tayyorgarlikning tashkiliy masalalari ham muhokama qilindi. Rossiya tomoni O‘zbekiston madaniyati kunlarini yuqori saviyada tashkil etish uchun zarur amaliy yordam ko‘rsatishga tayyor ekanini ma’lum qildi.
Ma’lumot uchun, o‘tgan yili O‘zbekistonda Rossiya Federatsiyasining Madaniyat kunlari yuqori saviyada o‘tkazilgan bo‘lib, tadbirlar doirasida Samarqand va Toshkent shaharlarida Rossiyaning musiqa, teatr, kino va boshqa san’at yo‘nalishlarini qamrab olgan madaniy dasturlar namoyish etilgan edi.
Joriy yilda esa "O‘zbekiston madaniyati kunlari" tadbirlarini Rossiya Federatsiyasida o‘tkazish rejalashtirilgan. Mazkur tadbirlar ikki mamlakat xalqlari o‘rtasidagi madaniy aloqalarni yanada mustahkamlash, ijodiy jamoalar o‘rtasida tajriba almashinuvini kengaytirish hamda yangi hamkorlik loyihalarini amalga oshirishga xizmat qiladi.
Uchrashuvdan so'ng, tashrifning madaniy dasturi doirasida Tojikiston Respublikasi madaniyat vaziri o‘rinbosari Obid Nazaryon boshchiligidagi delegatsiya bilan birgalikda Sankt-Peterburg shahrida joylashgan Imperator Yekaterina II saroyi — "Sarskoye selo" muzeyiga tashrif buyurildi.
Tashrif davomida muzey majmuasining boy tarixi va noyob me’moriy-san’at namunalari bilan tanishildi. Mazkur madaniy tashrif forum doirasida ishtirokchi davlatlar vakillari o‘rtasida madaniy muloqot va tajriba almashinuvini yanada rivojlantirishga xizmat qildi.