O‘zbekiston Respublikasi Madaniyat vazirligi

San-Marino Respublikasida Renata Tebaldi nomidagi XI Xalqaro vokalchilar tanlovining opera yo‘nalishi bo‘yicha 2026-yilgi bosqichi o‘z nihoyasiga yetdi. 18-sentyabr kuni San-Marinodagi Konkordiya teatrida o‘tkazilgan yakuniy konsertda tanlov g‘oliblari va sovrindorlari e’lon qilindi. Nufuzli xalqaro tanlovda turli davlatlardan iqtidorli vokal ijrochilar ishtirok etdi.

Sebastyan Shvars raisligidagi xalqaro hakamlar hay’ati tarkibiga Milan shahridagi La Skala teatri kasting menejeri Sebastyan Shvars, Korolevskaya opera va Versal Spectacles teatri vakili Loran Brunner, Dublindagi Irlandiya milliy operasi, Stokgolmdagi Korolevskaya shved operasi va Xyuston Grand operasi vakili Jonatan Frend, Zagrebdagi Xorvatiya milliy teatri vakili Iva Xraste-Socho hamda Sevilyadagi Teatr de la Maestransa vakili Xaver Menendes Alvares kirdi.

Hakamlar qaroriga ko‘ra, birinchi o‘rin O‘zbekiston vakili, bariton Aqlbek Piyazovga nasib etdi. U 5000 yevro miqdoridagi pul mukofoti hamda hakamlar hay’ati raisi tomonidan taklif etilgan shartnoma bilan taqdirlandi. Tanlovning ikkinchi o‘rinini soprano Yana Ayvazyan, uchinchi o‘rinini esa bas Sonxun Xan egalladi. Ularga mos ravishda 3000 va 1500 yevro miqdoridagi pul mukofotlari topshirildi.

Shuningdek, tanqidchilar hay’ati tomonidan ta’sis etilgan maxsus mukofot soprano Florentina Shumaxerga berildi. U 1000 yevro miqdoridagi mukofot bilan bir qatorda tomoshabinlar simpatiyasi sovrinini ham qo‘lga kiritdi. Tanlov doirasida boshqa maxsus mukofotlar ham o‘z egalarini topdi.

Jumladan, Soroptimist mukofoti tanlovning eng yosh ayol finalisti sifatida Yana Ayvazyanga berildi. Leone Madjiyeri jamg‘armasi tomonidan Alessiya Battiniga Italiyada yoki xorijda konsert berish imkoniyati taqdim etildi. Shuningdek, Cia Opera Sao Paulo tomonidan Alessiya Battiniga Braziliyaning San-Paulu shahrida konsert dasturida ishtirok etish taklif qilindi. Yakuniy konsert dasturidan Joakkino Rossini, Volfgang Amadey Motsart, Ambruaz Toma, Vinchenso Bellini, Umberto Jordano, Jakomo Puchchini va Juzeppe Verdi kabi buyuk kompozitorlarning opera asarlaridan ariyalar o‘rin oldi. O‘zbekistonlik bariton Akkilbek Piyazov yakuniy konsertda Juzeppe Verdining “Makbet” operasidan “Sostradaniye, uvajeniye, chest” ariyasini ijro etdi. Konsertda Rossini simfonik orkestri ishtirok etdi, dirijyorlik vazifasini Nikola Valentini bajardi.

Tanlovning yakuniy kechasi San-Marino Respublikasi kapitan-regentlari, Italiyaning San-Marinodagi elchisi Fabritsio Kolachechi va ko‘plab mehmonlar ishtirokida o‘tkazildi. Tadbir davomida Renata Tebaldi jamg‘armasini qo‘llab-quvvatlashdagi xizmatlari uchun Fabritsio Kolachechiga faxriy a’zolik unvoni berildi.

Shuningdek, tadbir doirasida Renata Tebaldining hayoti va ijodiy merosiga bag‘ishlangan “Ideal soprano. Renata Tebaldining insoniy va badiiy merosi” kitobi muallifi Lukas Vianini bilan suhbat ham o‘tkazildi. Tanlovning yakuniy konserti Ameria Radio orqali jahon bo‘ylab to‘g‘ridan to‘g‘ri efirga uzatildi.

O‘zbekistonlik yosh vokal ijrochisi Aqlbek Piyazovning mazkur nufuzli xalqaro tanlovda birinchi o‘rinni egallashi mamlakatimizda opera va vokal san’ati rivoji, yosh ijodkorlarning xalqaro maydondagi ishtiroki va professional mahorati yuksalib borayotganining muhim natijalaridan biri bo‘ldi.