Milliy musiqa va raqs san’atini rivojlantirishning yangi vazifalari belgilandi
2026-09-15 23:00:00 / Yangiliklar
Bugun, 15-sentyabr kuni Milliy cholg‘u ijrochiligi va Raqs san’ati ijodiy birlashmalarining bugungi faoliyati, erishilayotgan natijalari hamda istiqboldagi vazifalari muhokama qilindi.
Yig‘ilishda O‘zbekiston Respublikasi Prezidentining madaniyat bo‘yicha vakili Xasan Salixov, madaniyat vaziri o‘rinbosari Sanjar Bobojonov, Milliy cholg‘u ijrochiligi ijodiy rahbari Toir Qo‘ziyev, Raqs san’ati ijodiy birlashmasi ijodiy rahbari Charosoy Jo‘rabayeva, soha mutaxassislari, ijodkorlar hamda homiylar ishtirok etdi.
Muloqot davomida milliy musiqa va raqs san’atini yanada rivojlantirish, ijodiy jamoalar faoliyati samaradorligini oshirish, iste’dodli yoshlarni qo‘llab-quvvatlash hamda ularning kasbiy mahoratini yuksaltirish masalalariga alohida e’tibor qaratildi.
Xususan, milliy cholg‘u ijrochiligi yo‘nalishida an’anaviy ijro maktablarini asrab-avaylash va zamonaviy talqinlar bilan boyitish, ijodiy jamoalarning repertuarini kengaytirish, milliy cholg‘ularda ijro etiladigan asarlarni ommalashtirish borasida amalga oshirilayotgan ishlar xususida fikr almashildi.
Raqs san’ati yo‘nalishida esa milliy raqs maktablarini rivojlantirish, sahna madaniyati va ijro mahoratini yanada oshirish, milliy raqslarning o‘ziga xos uslub va an’analarini saqlab qolish bilan birga, yangi ijodiy yondashuvlarni joriy etish masalalari muhokama qilindi.
Shuningdek, ijodiy birlashmalarning konsert va sahna faoliyatini yanada jonlantirish, hududlarda madaniy tadbirlar soni va qamrovini kengaytirish, xalqaro festivallar va nufuzli san’at anjumanlarida munosib ishtirok etish bo‘yicha takliflar bildirildi.
Yig‘ilishda soha mutaxassislari va homiylar ham o‘z fikr va takliflari bilan ishtirok etib, ijodiy loyihalarni qo‘llab-quvvatlash, san’atkorlar uchun munosib ijodiy sharoitlar yaratish hamda milliy san’atni keng targ‘ib qilish yuzasidan fikr almashdilar.
Muhokamalar yakunida Milliy cholg‘u ijrochiligi va Raqs san’ati ijodiy birlashmalari faoliyatini yanada takomillashtirish, mavjud imkoniyatlardan samarali foydalanish va belgilangan vazifalarni izchil amalga oshirish bo‘yicha mas’ullarga tegishli tavsiya va topshiriqlar berildi.