Bugun, 15-sentyabr kuni Seulda O‘zbekiston Respublikasi madaniyat vaziri Ozodbek Nazarbekov hamda Koreya Respublikasi madaniyat, sport va turizm vaziri Chxve Xvi Yon o‘rtasida hamkorlik uchrashuvi bo‘lib o‘tdi.

Muloqot davomida ikki mamlakat o‘rtasidagi madaniy-gumanitar aloqalarni yanada rivojlantirish, mavjud hamkorlikni yangi bosqichga olib chiqish hamda istiqbolli qo‘shma loyihalarni amalga oshirish masalalari muhokama qilindi. Ta’kidlanganidek, O‘zbekiston va Koreya Respublikasi o‘rtasidagi munosabatlarning alohida strategik sheriklik darajasiga ko‘tarilgani ikki tomonlama hamkorlikni, xususan, madaniyat sohasidagi aloqalarni yanada kengaytirish uchun mustahkam zamin yaratmoqda.

Shu bilan birga, O‘zbekistonda istiqomat qilayotgan 200 mingdan ortiq koreys millatiga mansub yurtdoshlarimiz ikki xalq o‘rtasidagi do‘stlik va madaniy aloqalarni mustahkamlashda muhim o‘rin tutayotgani qayd etildi.

Uchrashuvda ayni kunlarda Koreya Respublikasining Kochxan, Boryon, Seul, Chondju, Andon va Sunchxon shaharlarida o‘tkazilayotgan “O‘zbekiston madaniyati kunlari” ikki davlat o‘rtasidagi madaniy almashinuvlarning amaliy ifodasi sifatida e’tirof etildi.

Muloqot davomida madaniy hamkorlikni tizimli va doimiy asosda rivojlantirishga qaratilgan yangi tashabbuslar ilgari surildi. Xususan, ikki vazirlik o‘rtasidagi qo‘shma madaniy loyihalarni muvofiqlashtirib boruvchi Madaniy hamkorlik bo‘yicha Qo‘shma amaliy ishchi qo‘mitasini tashkil etish taklif qilindi.

Shuningdek, “Koreya – Markaziy Osiyo do‘stlik kutubxonasi” tashabbusi doirasida Buxoro shahrida “Buyuk Ipak yo‘li kutubxonasi”ni barpo etish loyihasini birgalikda amalga oshirish masalasi muhokama qilindi. Tomonlar, shuningdek, madaniyat va san’atning turli yo‘nalishlarida qo‘shma loyihalarni ko‘paytirish, ijodkorlar o‘rtasidagi aloqalarni kengaytirish, tajriba almashish hamda madaniy almashinuv dasturlarini yanada rivojlantirish muhimligini ta’kidladilar.

Uchrashuv yakunida bildirilgan tashabbuslarni amaliy jihatdan ro‘yobga chiqarish, madaniy hamkorlikning yangi yo‘nalishlarini rivojlantirish hamda ikki mamlakat ijodkorlari o‘rtasidagi aloqalarni yanada mustahkamlash borasida hamkorlikni davom ettirishga kelishib olindi.

Mazkur kelishuv va tashabbuslar O‘zbekiston va Koreya Respublikalari o‘rtasidagi madaniy-gumanitar hamkorlikni yanada kengaytirish, yangi qo‘shma loyihalarni amalga oshirish hamda ikki xalq o‘rtasidagi do‘stlik va o‘zaro anglashuvni mustahkamlashga xizmat qiladi.

Eslatib o‘tamiz, joriy yilning 14–21-sentyabr kunlari Koreya Respublikasining Kochxan, Boryon, Seul, Chondju, Andon va Sunchxon shaharlarida “O‘zbekiston madaniyati kunlari” o‘tkazilmoqda.