Milliy musiqa va qo‘shiqchilik san’atimiz rivojiga munosib hissa qo‘shgan, betakror ijro mahorati bilan xalqimiz mehrini qozongan O‘zbekiston xalq hofizi Faxriddin Umarov tavalludining 100 yilligi keng nishonlanmoqda.

Kuni kecha O‘zbekiston kasaba uyushmalari saroyida Faxriddin Umarov tavalludining 100 yilligiga bag‘ishlangan xotira kechasi bo‘lib o‘tdi.

Unda madaniyat vazirining birinchi o‘rinbosari Nodirbek Sayfullayev, madaniyat va san’at sohasi vakillari, san’atshunoslar, taniqli ijodkorlar, hofizning shogirdlari hamda san’at ixlosmandlari ishtirok etdi.

Tadbirda Faxriddin Umarovning milliy qo‘shiqchilik san’ati rivojidagi o‘rni, serqirra ijodiy faoliyati va san’at maktabi haqida so‘z yuritildi. Ustoz hofizning hayoti va ijod yo‘li, san’atga bo‘lgan sadoqati, o‘ziga xos ijro uslubi hamda shogirdlar tarbiyasidagi xizmatlari alohida e’tirof etildi.

Xotira kechasining badiiy qismida hofizning shogirdlari va san’atkorlar tomonidan dilrabo kuy-qo‘shiqlar ijro etildi. Mumtoz va milliy musiqa namunalari tadbir ishtirokchilariga ko‘tarinki kayfiyat bag‘ishladi.

Faxriddin Umarovning 100 yillik yubileyi munosabati bilan tashkil etilgan mazkur xotira kechasi ustoz san’atkorning boy ijodiy merosini asrab-avaylash, uni yosh avlodga yetkazish va milliy qo‘shiqchilik san’ati an’analarini yanada rivojlantirish yo‘lidagi muhim madaniy-ma’rifiy tadbirlardan biri bo‘ldi.