O‘zbekiston Respublikasi madaniyat vaziri Ozodbek Nazarbekov hamda Buyuk Britaniya Musiqa industriyasi uyushmasi (UK Music) rahbari Tom Kiehl o‘rtasida hamkorlik uchrashuvi bo‘lib o‘tdi.

Uchrashuvda O‘zbekistonning Buyuk Britaniyadagi Favqulodda va muxtor elchisi Ravshan Usmonov ham ishtirok etdi.

Muloqot davomida ikki tomonlama madaniy aloqalarni yanada mustahkamlash, musiqa sanoatini rivojlantirish hamda istiqbolli qo‘shma loyihalarni amalga oshirish masalalari muhokama qilindi.

Xususan, Britaniyaning musiqa bozorini boshqarish, ovoz yozish sanoati va zamonaviy musiqa menejmenti sohalaridagi ilg‘or tajribasini O‘zbekistonda tatbiq etish masalasiga alohida e’tibor qaratildi.

Shuningdek, yosh iste’dodlarni qo‘llab-quvvatlash maqsadida musiqachilar, prodyuserlar va ovoz muhandislari uchun Buyuk Britaniyaning yetakchi mutaxassislari ishtirokida trening va mahorat darslarini tashkil etish bo‘yicha fikr almashildi.

Musiqa industriyasida mualliflik huquqini himoya qilish va raqamlashtirish yo‘nalishida hamkorlik qilish, striming platformalari bilan ishlash va raqamli bozorda ijodkorlar manfaatlarini ta’minlash masalalari ham muzokaralar markazida bo‘ldi.

Bundan tashqari, ikki mamlakat ijodkorlari ishtirokida qo‘shma festivallar, madaniy tadbirlar, gastrol safarlari va xalqaro musiqa loyihalarini yo‘lga qo‘yish istiqbollari muhokama qilindi.

Uchrashuv yakunida tomonlar ilgari surilgan tashabbuslarni amaliyotga tatbiq etish, istiqbolli loyihalarni birgalikda amalga oshirish va hamkorlikni yanada kengaytirish maqsadida doimiy muloqotni davom ettirishga kelishib oldilar.