O‘zbekiston Respublikasi Madaniyat vazirligi

O‘zbekiston Respublikasi Prezidentining madaniyat bo‘yicha vakili Xasan Salixov hamda madaniyat vaziri o‘rinbosari Odiljon Abduqahorov O‘zbekiston davlat konservatoriyasida ta’lim va tarbiya jarayoni uchun yaratilgan sharoitlar bilan tanishdi.

Tanishuv davomida O‘zbekiston davlat konservatoriyasining faoliyati, ta’lim jarayoni va mavjud imkoniyatlari haqida rektor Kamoliddin O‘rinboyev ma’lumot berdi.

Ayni paytda konservatoriyada 213 nafar professor-o‘qituvchi mehnat qilmoqda. Ularning 35 nafari professor, 44 nafari dotsent, 8 nafari fan doktori (DSc), 34 nafari fan doktori (PhD) hisoblanadi.

Konservatoriya hamda xorijiy nufuzli musiqaga ixtisoslashgan oliy ta’lim muassasalari va xalqaro tashkilotlar o‘rtasida 50 ga yaqin hamkorlik shartnomasi imzolangan.

O‘quv jarayoni zamonaviy ta’lim talablari, kredit-modul tizimi va amaliyotga yo‘naltirilgan ta’lim tamoyillari asosida tashkil etilgan. 2-, 3- va 4-kurslarda dual ta’lim shakli joriy qilingan.

Talabalarning mustaqil ta’lim olishi va individual mashg‘ulotlarini samarali tashkil etish maqsadida 30 dan ortiq maxsus mashg‘ulot xonalari tashkil etilgan.

Bugungi kunda konservatoriyada bakalavriat bosqichida 1003 nafar, magistraturada 102 nafar, jami 1105 nafar talaba tahsil olmoqda.

Tashrif davomida talabalar va ijodkorlarning konsert-ijrochilik faoliyatini rivojlantirishga qaratilgan infratuzilmaga ham alohida e’tibor qaratildi.

Xususan, konservatoriyaning Katta va Kichik zallari zamonaviy texnologiyalar hamda nufuzli xorijiy konsert zallari tajribasi asosida to‘liq qayta ta’mirlangan. Bunda zallarning akustika imkoniyatlari, o‘rindiqlar, maxsus jihozlar, ijodkorlar uchun kiyinish va grim xonalariga alohida e’tibor qaratilgan.

Shuningdek, konservatoriyaning Ovoz yozish studiyasi zamon talablari asosida qayta ta’mirlanib, xalqaro standartlarga mos eng so‘nggi texnik jihozlar bilan ta’minlangan.

Yosh ijodkorlarning o‘z mahoratini namoyish etishi, konsert dasturlari, mahorat darslari va xorijiy professor-o‘qituvchilar hamda taniqli ijrochilar ishtirokidagi tadbirlarni yuqori professional darajada o‘tkazish maqsadida Kamer zali ham foydalanishga topshirilgan.

Tashrif yakunida konservatoriyada ta’lim sifati, o‘quv jarayoni va ijodiy faoliyatni yanada rivojlantirish bo‘yicha mas’ullarga tegishli tavsiyalar berildi.

Eslatib o‘tamiz, kuni kecha Ta’lim sifatini ta’minlash milliy agentligi tomonidan bitiruvchilar sifati indeksi natijalari asosida ta’lim sifati bo‘yicha eng yuqori ko‘rsatkich qayd etgan TOP-20 oliy ta’lim muassasasi ro‘yxati e’lon qilingan edi.

Quvonarlisi, mazkur ro‘yxatdan Madaniyat vazirligi tasarrufidagi O‘zbekiston davlat konservatoriyasi hamda uning Nukus filiali ham munosib o‘rin egallagan edi.

Ushbu natija ta’lim muassasalarida ta’lim sifatini oshirish, zamonaviy o‘quv yondashuvlarini joriy etish hamda malakali mutaxassislar tayyorlash borasida amalga oshirilayotgan ishlarning samaradorligini ko‘rsatadi.