“Bir Vatan – turli millat ohangida” nomli respublika qo‘shiqlar tanlovi g‘oliblari taqdirlandi
2026-09-04 15:10:00 / Yangiliklar
Bugungi kunda mamlakatimizda madaniyat va san’at sohasini rivojlantirish, ijodkorlarni har tomonlama qo‘llab-quvvatlash, milliy san’atimizning boy an’analarini asrab-avaylash hamda ularni yosh avlodga yetkazish borasida keng ko‘lamli ishlar amalga oshirilmoqda.
O‘zbekiston Respublikasi Prezidentining 2026-yil 1-apreldagi “O‘zbekiston Respublikasi davlat mustaqilligining 35 yilligini keng nishonlashga tayyorgarlik ko‘rish va uni o‘tkazish to‘g‘risida”gi PQ–120-son qarori ijrosini ta’minlash, yosh iste’dodlarni aniqlash va qo‘llab-quvvatlash, shuningdek, Vatanga muhabbat, yurtga sadoqat va vatanparvarlik tuyg‘ularini tarannum etuvchi yangi ijodiy asarlar yaratilishini rag‘batlantirish maqsadida “Bir Vatan – turli millat ohangida” nomli respublika qo‘shiqlar tanlovi tashkil etildi.
Tanlovda 7 yoshdan 70 yoshgacha bo‘lgan professional va havaskor ijodkorlar ishtirok etib, Vatan, mustaqillik, tinchlik, do‘stlik hamda yurtimizning bunyodkorlik salohiyatini tarannum etuvchi 100 dan ortiq ijodiy asarlar taqdim etildi.
Ishtirokchilarning ijodiy ishlari katta tajriba va yuksak kasbiy mahoratga ega professional hakamlar hay’ati tomonidan xolisona baholanib, eng munosib ijodiy ishlar hamda g‘oliblar aniqlandi.
Mustaqillikning 35 yilligi doirasida o‘tkazilgan tanlov g‘oliblari:
- I o‘rin — Tulanova Sevara — “O‘zbekiston” qo‘shig‘i bilan;
- II o‘rin — Qurbonov Dilmurod — “Elimning yoshlari” qo‘shig‘i bilan;
- II o‘rin — Mo‘minova Kumush va Tog‘ayev Javohir — “Ona yurtim” qo‘shig‘i bilan;
- III o‘rin — Turg‘unova Nigora — “Jonim ichra Jonimdirsan” qo‘shig‘i bilan;
- III o‘rin — Raximova Nigina — “Iftixor” qo‘shig‘i bilan.
Tanlov g‘oliblari I o‘rin uchun 50 million so‘m, II o‘rin uchun 40 million so‘m, III o‘rin uchun 30 million so‘m miqdorida pul mukofotlari bilan taqdirlandi. Mukofotlarni madaniyat vaziri o‘rinbosari Odiljon Abduqahhorov tantanali ravishda topshirdi.
Tadbir doirasida tanlovda faol ishtirok etgan va yuqori natijalarga erishgan yosh ijodkorlarni munosib rag‘batlantirish, ularning ijodiy salohiyatini yanada rivojlantirish hamda kelgusidagi faoliyatini qo‘llab-quvvatlashga alohida e’tibor qaratildi.
Mazkur tanlov yosh iste’dodlarni kashf etish, ularning ijodiy imkoniyatlarini namoyon etish va milliy san’atimiz rivojiga munosib hissa qo‘shish uchun muhim maydon bo‘lib xizmat qilmoqda.