Bugun, 3-sentabr kuni Madaniyat vazirligida mamlakatimiz davlat mustaqilligining 35 yilligi munosabati bilan bir guruh madaniyat va san’at sohasi vakillari hamda yosh ijodkorlarga “O‘zbekiston Respublikasi mustaqilligining 35 yilligi” esdalik nishonlarini tantanali topshirish marosimi bo‘lib o‘tdi.

Mazkur tadbir O‘zbekiston Respublikasi Prezidentining 2026-yil 22-avgustdagi “O‘zbekiston Respublikasi mustaqilligining 35 yilligi” esdalik nishoni bilan taqdirlash to‘g‘risida”gi PF–168-son Farmoni ijrosi doirasida tashkil etildi.

Unda milliy madaniyatimiz va san’atimiz rivojiga ko‘p yillar davomida munosib hissa qo‘shib kelayotgan, o‘zining fidokorona mehnati, yuksak kasbiy mahorati va ijodiy faoliyati bilan soha taraqqiyotiga xizmat qilayotgan bir guruh madaniyat va san’at sohasi vakillari, shuningdek, ijodiy izlanishlari va yutuqlari bilan e’tirof etilgan yosh ijodkorlar munosib taqdirlandi. Esdalik nishonlarini madaniyat vaziri o‘rinbosari Odiljon Abduqahhorov tantanali ravishda topshirdi.

Ta’kidlash joizki, O‘zbekiston Respublikasi Prezidentining 2026-yil 1-apreldagi “O‘zbekiston Respublikasi davlat mustaqilligining 35 yilligini keng nishonlashga tayyorgarlik ko‘rish va uni o‘tkazish to‘g‘risida”gi PQ–120-son qarori ijrosini ta’minlash, yosh iste’dodlarni aniqlash va qo‘llab-quvvatlash, Vatanga muhabbat, yurtga sadoqat va vatanparvarlik tuyg‘ularini tarannum etuvchi yangi ijodiy asarlar yaratilishini rag‘batlantirish maqsadida “Bir Vatan – turli millat ohangida” nomli respublika qo‘shiqlar tanlovi tashkil etildi.

Mazkur tanlovda 7 yoshdan 70 yoshgacha bo‘lgan professional va havaskor ijodkorlar ishtirok etib, Vatan, mustaqillik, tinchlik, do‘stlik va yurtimizning bunyodkorlik salohiyatini tarannum etuvchi 100 dan ortiq ijodiy asarlar taqdim etildi.

Tanlov ishtirokchilarining ijodiy ishlari xalqimiz ardog‘idagi, katta tajriba va yuksak kasbiy mahoratga ega professional hakamlar hay’ati tomonidan xolisona baholanib, eng munosib ijodiy ishlar hamda g‘oliblar aniqlandi.

Bugungi tadbir doirasida ana shu tanlovda faol ishtirok etgan va yuqori natijalarga erishgan yosh ijodkorlar ham munosib rag‘batlantirildi.

Taqdirlash marosimida yosh iste’dodlarni qo‘llab-quvvatlash, ularning ijodiy salohiyatini yanada rivojlantirish, yangi asarlar yaratishga ilhomlantirish hamda kelgusidagi faoliyati uchun keng imkoniyatlar yaratish muhim vazifalardan ekani ta’kidlandi.

Yosh ijodkorlarning bunday e’tirof etilishi ularni Vatanimiz madaniy va ma’naviy hayotida faol ishtirok etishga, milliy san’atimiz an’analarini davom ettirishga hamda yangi ijodiy marralarni zabt etishga undaydi.

Tadbir yakunida taqdirlangan yoshlarga kelgusidagi ijodiy faoliyatida muvaffaqiyatlar tilanib, ularning yorqin iste’dodi va yangi ijodiy ishlari bilan milliy madaniyatimiz ravnaqiga munosib hissa qo‘shishlariga ishonch bildirildi.