Bugun, 2-sentyabr kuni O‘zbekiston Respublikasi Mustaqilligining 35 yilligi munosabati bilan poytaxtimizning Mirzo Ulug‘bek tumanida zamonaviy 5-son “Yulduz” madaniyat markazi hamda 120 o‘rinli musiqa va san’atga ixtisoslashgan xususiy maktabgacha ta’lim muassasasi foydalanishga topshirildi.

Ochilish marosimida O‘zbekiston Respublikasi Prezidentining madaniyat bo‘yicha vakili Xasan Salixov, madaniyat vaziri Ozodbek Nazarbekov, soha xodimlari hamda mahalla vakillari ishtirok etdi.

Bugungi kunda mamlakatimizda madaniyat va san’atni xalqimizga yanada yaqinlashtirish, bolalar va yoshlarni ijodga keng jalb etish, ularning iste’dod va qobiliyatini erta yoshdan aniqlash hamda rivojlantirishga alohida e’tibor qaratilmoqda.

Xususan, Prezidentimizning PQ–150-son qarori bilan madaniyat va san’at sohasida boshqaruvni takomillashtirish, xususiy sektor ishtirokini kengaytirish hamda davlat-xususiy sheriklik mexanizmlaridan samarali foydalanish bo‘yicha muhim vazifalar belgilangan.

Mazkur vazifalar ijrosi doirasida amalga oshirilgan yangi loyiha davlat-xususiy sheriklik asosida tashkil etildi. Loyiha doirasida umumiy maydoni 255 kvadrat metr bo‘lgan zamonaviy madaniyat markazi hamda 120 o‘rinli musiqa va san’atga ixtisoslashgan xususiy maktabgacha ta’lim muassasasi barpo etildi.

Loyihaning umumiy qiymati 10,5 milliard so‘mni tashkil etib, natijada 37 ta yangi ish o‘rni yaratildi. Yangi madaniyat markazida bolalar va yoshlarning ijodiy qobiliyatini rivojlantirish maqsadida raqs, milliy cholg‘u, tasviriy san’at va musiqa yo‘nalishlarida to‘garaklar tashkil etiladi. Mashg‘ulotlar uchun zarur sharoitlar yaratilib, markaz zamonaviy jihozlar va musiqa cholg‘ulari bilan ta’minlangan.

Shuningdek, 120 o‘rinli musiqa va san’atga ixtisoslashgan maktabgacha ta’lim muassasasi bolajonlarni ilk yoshdan san’at va musiqa muhitida tarbiyalash, ularning iste’dod va qobiliyatini erta aniqlash hamda rivojlantirish uchun muhim imkoniyat yaratadi.

Yangi maskanning Mustaqilligimizning 35 yilligi munosabati bilan foydalanishga topshirilishi mamlakatimizda madaniyat va san’atni rivojlantirish, aholiga madaniy xizmatlarni yanada yaqinlashtirish, yosh avlodning ijodiy salohiyatini qo‘llab-quvvatlash borasidagi ishlar izchil davom etayotganining amaliy ifodasidir.

Ishonchimiz komilki, “Yulduz” madaniyat markazi mahalla aholisi, ayniqsa, bolalar va yoshlarning bo‘sh vaqtini mazmunli tashkil etish, ularni madaniyat va san’atga keng jalb qilish hamda yangi iste’dodlarni kashf etishda muhim maskanga aylanadi.

Mazkur loyiha davlat va xususiy sektor o‘rtasidagi samarali hamkorlikning yana bir namunasi sifatida zamonaviy madaniy infratuzilmani rivojlantirish, madaniyat va san’at sohasida xizmatlar sifatini oshirishga xizmat qiladi.