Bugun, 25-avgust kuni Madaniyat vazirligida “O‘zbekiston Respublikasi Prezidenti Administratsiyasi to‘g‘risida”gi O‘zbekiston Respublikasining Konstitutsiyaviy Qonuni mazmun-mohiyati, uning vazirlik va tizim tashkilotlari faoliyatiga ta’siri hamda Qonundan kelib chiqadigan vazifalarga bag‘ishlangan Hay’at yig‘ilishi bo‘lib o‘tdi.

Unda madaniyat vaziri Ozodbek Nazarbekov, vazir o‘rinbosarlari, Vazirlar Mahkamasining mas’ul xodimi Elyorjon Jalilov, Toshkent davlat yuridik universitetining Xalqaro huquq va qiyosiy huquqshunoslik fakulteti dekani, yuridik fanlar bo‘yicha falsafa doktori Elyor Rahmatov, vazirlikning markaziy apparati rahbarlari hamda hududiy studiyadan soha vakillari ishtirok etdi.

Yig‘ilishda mazkur Konstitutsiyaviy Qonunning asosiy mazmun-mohiyati, unda belgilangan yangi huquqiy talablar, davlat organlari faoliyatida mas’uliyat va natijadorlikni oshirishga qaratilgan normalar haqida atroflicha ma’lumot berildi.

Madaniyat vaziri Ozodbek Nazarbekov o‘z so‘zida Qonun talablarini faqat huquqshunoslar yoki ijro intizomi uchun mas’ul xodimlar emas, balki vazirlikning barcha tarkibiy bo‘linmalari va tizim tashkilotlari chuqur o‘rganishi zarurligini ta’kidladi.

“Endilikda Prezident hujjatlari ijrosiga talab yanada kuchayadi. Qonunda Prezident farmonlari, qarorlari, farmoyishlari va topshiriqlarini ijro etishni tashkillashtirish, monitoring qilish va nazorat qilishning aniq mexanizmlari belgilangan. Shu bois har bir tarkibiy bo‘linma o‘z faoliyatini yangi huquqiy talablar asosida qayta ko‘rib chiqishi va aniq natijaga yo‘naltirishi lozim”, — dedi vazir.

Yig‘ilishda Toshkent davlat yuridik universiteti vakili Elyor Rahmatov tomonidan Konstitutsiyaviy Qonunning maqsadi va ahamiyati haqida tushuntirish berildi. Xususan, Qonun bilan Prezident Administratsiyasining huquqiy maqomi, vazifalari, vakolatlari, tarkibiy tuzilishi hamda Oliy Majlis, Vazirlar Mahkamasi, vazirlik va idoralar, shuningdek, mahalliy hokimliklar bilan o‘zaro munosabatlari tartibga solingani qayd etildi.

Yig‘ilish yakunida Qonundan kelib chiqadigan aniq vazifalar belgilab berildi. Jumladan, vazirlikning Yuridik bo‘limga bir hafta muddatda Konstitutsiyaviy Qonunni moddama-modda tahlil qilish hamda Madaniyat vazirligi va tizim tashkilotlari faoliyatiga daxldor normalar yuzasidan tizim tashkilotlari xodimlari uchun seminarlar tashkil etish vazifasi yuklatildi.

Shuningdek, har bir boshqarma va bo‘lim o‘z zimmasidagi vazifalarni qayta ko‘rib chiqib, ularning aniq natijasi, o‘lchov ko‘rsatkichlari, bajarish muddatlari va mas’ullarini belgilashi lozimligi ta’kidlandi.

Yig‘ilishda ta’kidlanganidek, mazkur Konstitutsiyaviy Qonun davlat boshqaruvida mas’uliyat, muvofiqlashtirish, nazorat, tahliliy yondashuv va natijadorlikni yanada kuchaytirishga xizmat qiladi.

Shu bois Qonunni navbatdagi qonunchilik hujjati sifatida emas, balki Madaniyat vazirligida boshqaruv sifatini oshirish, ish jarayonlarini takomillashtirish va aniq natijadorlikni ta’minlashga qaratilgan muhim huquqiy asos sifatida qabul qilish zarurligi qayd etildi.