O‘zbekiston Respublikasi Madaniyat vazirligi

20-avgust kuni Madaniyat vazirligida bolalar musiqa va san’at maktablari direktorlarining kasbiy salohiyatini oshirishga qaratilgan navbatdagi o‘quv-seminar tashkil etildi.

Seminarning asosiy maqsadi rahbar xodimlarning boshqaruv kompetensiyalarini rivojlantirish, amaldagi qonunchilik hujjatlarining mazmun-mohiyatini chuqur o‘zlashtirish, ijro intizomini mustahkamlash hamda zamonaviy boshqaruv mexanizmlarini amaliyotga samarali joriy etishga ko‘maklashishdan iborat bo‘ldi.

Tadbir davomida vazirlikning mas’ul mutaxassislari tomonidan ijro intizomini samarali tashkil etish, qonunchilikdagi yangi talab va normalar, hujjatlar ijrosini nazorat qilish tartiblari hamda rahbarlarning shaxsiy mas’uliyati yuzasidan batafsil ma’lumotlar berildi.

Shuningdek, ishtirokchilarga Ijro.gov.uz elektron tizimidan samarali foydalanish, elektron hujjatlar bilan ishlash, topshiriqlar ijrosini monitoring qilish va hisobotlarni o‘z vaqtida shakllantirish bo‘yicha amaliy mashg‘ulotlar o‘tkazildi. Tizimlardan foydalanishda uchrashi mumkin bo‘lgan muammolar va ularning yechimlari yuzasidan ham tavsiyalar berildi.

O‘quv-seminar doirasida maktab direktorlari Madaniyat vazirligi markaziy apparatining boshqarma va bo‘limlari faoliyati bilan yaqindan tanishdilar. Uchrashuvlarda madaniyat va san’at sohasida amalga oshirilayotgan islohotlar, ustuvor vazifalar, zamonaviy boshqaruv yondashuvlari hamda tarkibiy bo‘linmalarning asosiy faoliyat yo‘nalishlari haqida ma’lumotlar taqdim etildi.

Ochiq muloqotlar davomida ishtirokchilar mutaxassislar bilan fikr almashib, o‘zlarini qiziqtirgan savollarga javob oldilar. Amaliy tajriba almashinuvi va ilg‘or ish usullarining muhokama qilinishi seminar mazmunini yanada boyitdi.

Mazkur o‘quv-seminar bolalar musiqa va san’at maktablari direktorlarining kasbiy bilim va boshqaruv ko‘nikmalarini mustahkamlash, ijro intizomini ta’minlash, elektron boshqaruv tizimlaridan samarali foydalanish hamda ta’lim muassasalarida boshqaruv sifatini yanada oshirishga xizmat qiladi.