Bugun, 17-avgust kuni O‘zbekiston Respublikasi Prezidentining madaniyat bo‘yicha vakili Hasan Salihov hamda madaniyat vaziri Ozodbek Nazarbekov Xorazm viloyatidagi qator madaniyat va san’at muassasalari faoliyati bilan tanishdi.

O‘rganishlar davomida viloyatda madaniyat va san’at sohasida amalga oshirilayotgan ishlar, mavjud imkoniyatlar hamda istiqboldagi loyihalar ko‘rib chiqildi.

Xususan, O‘zbekiston davlat filarmoniyasining Xorazm viloyati bo‘linmasi faoliyati bilan tanishilib, muassasaning ijodiy salohiyati, moddiy-texnik bazasi hamda san’atkorlar uchun yaratilgan sharoitlar ko‘zdan kechirildi.

Shuningdek, O‘zbekiston davlat xoreografiya akademiyasi Urganch filiali uchun barpo etilayotgan yangi binoda olib borilayotgan qurilish ishlari ko‘rib chiqildi. Mazkur loyiha yoshlarning xoreografiya san’atini chuqur o‘rganishi va kelgusida professional ijodkorlar sifatida shakllanishi uchun muhim imkoniyat yaratishi ta’kidlandi.

Urganch ixtisoslashtirilgan boshlang‘ich raqs san’ati maktab-internatida olib borilayotgan ta’mirlash jarayonlari ham o‘rganilib, o‘quvchilar uchun yaratilayotgan sharoitlarni yanada yaxshilash yuzasidan mas’ullarga tegishli topshiriqlar berildi.

Shuningdek, yangi ta’mirdan chiqarilgan Urganch shahridagi 23-son Madaniyat markazi faoliyati bilan tanishilib, aholiga madaniy xizmat ko‘rsatish, ijodiy jamoalar faoliyatini rivojlantirish hamda bo‘sh vaqtni mazmunli tashkil etish borasidagi ishlar muhokama qilindi.

So‘ng Lazgi muzeyi faoliyati bilan ham yaqindan tanishildi. Muzeyda Xorazmning betakror raqs san’ati — Lazgining ko‘p asrlik tarixi, o‘ziga xos an’analari va boy madaniy merosi keng namoyish etilgan. Mazkur maskan Lazgi san’atini asrab-avaylash, uni keng targ‘ib etish hamda kelajak avlodga yetkazishda muhim ahamiyat kasb etadi.

Kun yakunida madaniyat va san’at sohasidagi loyihalarni yanada rivojlantirish, muassasalar faoliyatini takomillashtirish hamda ijodkorlar uchun munosib shart-sharoitlar yaratish yuzasidan fikr va takliflar bildirildi.