Bugun, 6-avgust kuni Madaniyat vazirligida vazir Ozodbek Nazarbekov jismoniy va yuridik shaxslar vakillari bilan navbatdagi shaxsiy qabulni o‘tkazdi. Qabul davomida 13 nafar fuqarolar tomonidan ilgari surilgan taklif va masalalar atroflicha ko‘rib chiqildi.

Shaxsiy qabul jarayonida madaniyat va san’at sohasini rivojlantirishga oid qator dolzarb masalalar muhokama qilindi. Jumladan, yakkaxon konsert dasturlarini tashkil etish, ijodkorlar tomonidan yaratilgan qo‘shiqlar uchun videokliplar suratga olish, mualliflik huquqlarini himoya qilish hamda intellektual mulkka oid huquqiy masalalar yuzasidan murojaatlar tinglandi.

Shuningdek, madaniyat sohasida tahsil olish istagida bo‘lgan yoshlarga o‘qishga kirish jarayonida imtiyozlar berish, sohaga oid ish o‘rinlariga joylashish, mediakontent loyihalarini amalga oshirish va ularni qo‘llab-quvvatlash bo‘yicha takliflar ham ko‘rib chiqildi.

Vazir har bir murojaatni alohida o‘rganib, ular yuzasidan mas’ul tarkibiy bo‘linmalar rahbarlariga tegishli topshiriqlar berdi. Qonunchilik doirasida hal etilishi mumkin bo‘lgan masalalar bo‘yicha amaliy choralar belgilab olindi, qo‘shimcha o‘rganish talab etiladigan murojaatlar esa nazoratga olindi.

Madaniyat vazirligida jismoniy va yuridik shaxslarning murojaatlarini qabul qilish, ularning muammolarini qonunchilik asosida hal etish hamda sohani rivojlantirishga qaratilgan takliflarni qo‘llab-quvvatlash bo‘yicha ishlar izchil davom ettirilmoqda.