Xonadonlar o‘z egalariga topshirildi
2024-09-01 15:55:00 / Yangiliklar
Bugun, 1-sentyabr kuni madaniyat xodimlarining mehnatini rag‘batlantirish hamda uy-joy sharoitlarini yaxshilash maqsadida Yashnobod tumanida qurilayotgan uy-joylardan 35 ta xonadonlar tantanali o’z egalariga topshirildi.
Tadbirda madaniyat vaziri Ozodbek Nazarbekov ishtirok etib, xonadon kalitlarini xonadon egalariga taqdim etdi.
“Bugungi unutilmas va hayajonli damlarni anchadan beri intiq bo‘lib kutgan aziz do‘stlar!
Mana, nihoyat o‘sha kun keldi!
Ishoninglar, mening hozirgi hayajonim, quvonchim sizlarnikidan aslo kam emas.
Hurmatli tadbir ishtirokchilari!
Avvalo, barchangizni Vatanimiz mustaqilligining 33 yilligi bilan chin qalbimdan tabriklayman.
Bu yilgi bayram sizlar uchun bir umrga unutilmaydigan, doim shirin xotira sifatida esga olinadigan qo‘shaloq xursandchilik bo‘lib kelganidan barchamiz behad mamnunmiz”
-dedi vazir Ozodbek Nazarbekov o’z nutqida.
“Inson qadri uchun” tamoyili ustuvor bo‘lgan jamiyatda madaniyat sohasi vakillariga hukumat tomonidan qaratilayotgan e’tibor hamda g’amxo’rlikdan benihoya mamnun ekanliklari tadbir ishtirokchilari tomonidan ta’kidlandi.
Tadbir davomidagi bayramona konsert dasturi yig’ilganlarga ko’tarinki kayfiyat bag’ishladi.
Bugunki kun madaniyat xodimlari uchun qo’shaloq bayramga aylandi.