O‘zbekiston Respublikasi Madaniyat vazirligi

R.M. Glier nomidagi Respublika ixtisoslashtirilgan musiqa maktabi hamda Respublika musiqa va san’at oliy maktabiga O‘zbekiston Respublikasi Prezidentining madaniyat bo‘yicha vakili Xasan Salixov tashrif buyurdi.

Tashrif davomida ta’lim muassasalarida yaratilgan zamonaviy shart-sharoitlar, o‘quv jarayonining tashkil etilishi, pedagog kadrlar faoliyati, o‘quv-uslubiy ta’minot, moddiy-texnik baza hamda ta’lim sifatini oshirish yo‘lida amalga oshirilayotgan islohotlar bilan batafsil tanishildi.

O‘quv xonalari, musiqa cholg‘ulari bilan jihozlangan sinflar, amaliy mashg‘ulotlar uchun yaratilgan imkoniyatlar va ta’lim jarayonining samaradorligini oshirishga qaratilgan ishlar yuzasidan mas’ullar bilan muloqot qilindi.

Shuningdek, 2026/2027-o‘quv yili uchun tashkil etilgan qabul jarayonlari ham atroflicha ko‘zdan kechirildi. Qabul komissiyalarining faoliyati, abituriyentlar va ularning ota-onalari uchun yaratilgan qulay sharoitlar, hujjatlarni qabul qilish hamda kirish imtihonlarini ochiq, xolis va shaffof tashkil etish bo‘yicha amalga oshirilayotgan ishlar o‘rganildi. Imtihon jarayonlarining adolatli va amaldagi tartib-qoidalarga muvofiq tashkil etilishi yuzasidan mas’ullarga tegishli tavsiyalar bildirildi.

Tashrif doirasida o‘quvchilar uchun mo‘ljallangan yotoqxona va turar joylar ham ko‘zdan kechirildi. Xonalarning sanitariya-gigiyena holati, xavfsizlik choralarining ta’minlanishi, dam olish va mustaqil ta’lim olish uchun yaratilgan sharoitlar bilan yaqindan tanishildi. O‘quvchilarning yashash, ovqatlanish va bo‘sh vaqtini mazmunli tashkil etish masalalariga alohida e’tibor qaratildi.

Tashrif yakunida muassasalarda mavjud ayrim muammo va kamchiliklar tahlil qilinib, ularni qisqa muddatlarda bartaraf etish, moddiy-texnik bazani yanada mustahkamlash, ta’lim sifatini oshirish hamda o‘quvchilar uchun yanada qulay va zamonaviy sharoitlar yaratish yuzasidan mas’ullarga tegishli tavsiya va topshiriqlar berildi.