O‘zbekiston Respublikasi Madaniyat vazirligi

Yunus Rajabiy nomidagi O‘zbekiston milliy musiqa san’ati institutiga O‘zbekiston Respublikasi Prezidentining madaniyat bo‘yicha vakili Xasan Salixov hamda O‘zbekiston Respublikasi madaniyat vazirining birinchi o‘rinbosari Nodirbek Sayfullayev tashrif buyurdi. Tashrif davomida institutda ta’lim, ilm-fan va milliy musiqa merosini asrash yo‘nalishlarida amalga oshirilayotgan ishlar bilan yaqindan tanishilib, istiqboldagi rivojlanish rejalari muhokama qilindi.

Dastlab mehmonlar institutning o‘quv jarayoni, professor-o‘qituvchilarning ilmiy faoliyati hamda zamonaviy moddiy-texnik bazasi bilan tanishdilar. Ta’lim sifatini oshirish, milliy musiqa san’ati bo‘yicha yuqori malakali mutaxassislarni tayyorlash va o‘quv jarayoniga ilg‘or pedagogik yondashuvlarni joriy etish borasida amalga oshirilayotgan ishlar yuzasidan batafsil ma’lumot berildi.

Tashrif doirasida Musiqa terapiyasi ilmiy-amaliy laboratoriyasi faoliyati alohida ko‘zdan kechirildi. Mehmonlarga musiqa terapiyasining inson salomatligini mustahkamlash, ruhiy holatini tiklash hamda reabilitatsiya jarayonlaridagi samaradorligi, ushbu yo‘nalishda olib borilayotgan ilmiy tadqiqotlar va amaliy loyihalar haqida atroflicha ma’lumot taqdim etildi. Laboratoriyaning ilmiy salohiyati va istiqboldagi rivojlanish yo‘nalishlari yuqori baholandi.

Shuningdek, delegatsiya Yunus Rajabiy muzeyini ham ziyorat qildi. Muzey fondida saqlanayotgan noyob qo‘lyozmalar, musiqa cholg‘ulari, tarixiy hujjatlar va boshqa qimmatli eksponatlar milliy musiqa merosini asrash hamda kelajak avlodlarga yetkazish yo‘lidagi muhim boylik sifatida e’tirof etildi. Yunus Rajabiy ijodiy merosining o‘zbek milliy musiqa san’ati taraqqiyotidagi o‘rni alohida qayd etildi.

Tashrif davomida institut auditoriyalariga atoqli san’at va madaniyat namoyandalari nomlari berilgani haqida ma’lumot berilib, bu tashabbus yosh avlodni buyuk ustozlar ijodiga hurmat ruhida tarbiyalashga xizmat qilishi ta’kidlandi.

Mehmonlar uchun milliy musiqa san’atining betakror namunalaridan maqom asarlari, shuningdek, Xorazm dostonchilik maktabiga mansub baxshichilik ijrolari namoyish etildi. Jonli ijrolar o‘zbek xalqining boy musiqiy merosi va an’anaviy ijrochilik maktablarining bugungi kundagi rivojini yaqqol namoyon etdi.

Tashrif doirasida institut faoliyatiga bag‘ishlangan taqdimot ham o‘tkazildi. Unda 2025/2026-o‘quv yilida ta’lim, ilmiy-tadqiqot, ma’naviy-ma’rifiy ishlar hamda xalqaro hamkorlik yo‘nalishlarida amalga oshirilgan islohotlar, erishilgan natijalar va istiqboldagi ustuvor vazifalar haqida batafsil axborot berildi. Xususan, professor-o‘qituvchilarning ilmiy salohiyati, xalqaro ilmiy jurnallardagi nashrlari, talabalarning yutuqlari hamda ta’lim sifatini oshirish borasidagi ishlar alohida e’tirof etildi.

Taqdimot davomida institut rektori Eldor Shermanov tomonidan innovatsion "Maqom kapsulasi" loyihasi taqdim etildi. Loyiha milliy maqom san’atini zamonaviy raqamli texnologiyalar asosida saqlash, ilmiy o‘rganish, targ‘ib etish hamda keng jamoatchilik, ayniqsa yosh avlod uchun yanada ommalashtirishga qaratilgani ta’kidlandi. Mazkur tashabbus milliy musiqa merosini raqamlashtirish va uni xalqaro miqyosda keng targ‘ib etish yo‘lidagi muhim qadam sifatida baholandi.

Shuningdek, O‘zbekiston milliy musiqa san’ati instituti huzurida mamlakat tarixida ilk bor Musiqa terapiyasi assotsiatsiyasini tashkil etish tashabbusi ilgari surildi. Mazkur assotsiatsiya sohada faoliyat yuritayotgan mutaxassislarni birlashtirish, ilmiy izlanishlarni qo‘llab-quvvatlash, xalqaro tajribani joriy etish hamda musiqa terapiyasining amaliy imkoniyatlarini yanada kengaytirishga xizmat qilishi qayd etildi.

Tashrif yakunida mas’ul mutasaddilar institutning Registrator ofisi faoliyati bilan ham tanishdilar. Ta’lim jarayonlarini raqamlashtirish, boshqaruv tizimini takomillashtirish, talabalar va professor-o‘qituvchilar uchun yaratilgan zamonaviy xizmatlar, elektron boshqaruv tizimlari hamda xizmat ko‘rsatish sifati yuqori baholandi.

Yakunda Prezidentning madaniyat bo‘yicha vakili Xasan Salixov hamda madaniyat vazirining birinchi o‘rinbosari Nodirbek Sayfullayev institut jamoasi tomonidan amalga oshirilayotgan islohotlarni e’tirof etib, milliy musiqa san’ati, ilm-fan va ta’limni yanada rivojlantirish, madaniy merosni asrab-avaylash hamda zamonaviy texnologiyalar asosida targ‘ib qilish borasidagi ishlarni izchil davom ettirish yuzasidan o‘z tavsiya va takliflarini bildirdilar.