O‘zbekiston Respublikasi Madaniyat vazirligi

O‘zbekiston Respublikasi Madaniyat vaziri Ozodbek Nazarbekov xizmat safari doirasida Gretsiya Respublikasida bo‘lib, ikki davlat o‘rtasidagi madaniy aloqalarni yanada rivojlantirishga qaratilgan qator muhim uchrashuv va muzokaralarda ishtirok etdi.

Samarqand shahrida boshlangan oliy darajadagi muloqotlarning mantiqiy davomi sifatida Afina shahrida O‘zbekiston Respublikasi Madaniyat vaziri Ozodbek Nazarbekov hamda Gretsiya Respublikasi Madaniyat vaziri, doktor Lina Mendoni o‘rtasida rasmiy uchrashuv bo‘lib o‘tdi. Muzokaralar davomida ikki mamlakat o‘rtasidagi madaniy-gumanitar hamkorlikning bugungi holati va uni yangi bosqichga olib chiqish istiqbollari atroflicha muhokama qilindi.


Uchrashuvning asosiy kun tartibidan O‘zbekiston Respublikasi va Gretsiya Respublikasi Hukumatlari o‘rtasida 2026–2028 yillarga mo‘ljallangan Madaniy hamkorlik dasturini imzolash hamda uning samarali ijrosini ta’minlash masalalari o‘rin oldi. Tomonlar mazkur hujjat ikki davlat o‘rtasidagi madaniy aloqalarni tizimli ravishda rivojlantirish, o‘zaro tajriba almashish va qo‘shma loyihalarni amalga oshirish uchun muhim huquqiy asos bo‘lib xizmat qilishini ta’kidladilar.

Muzokaralar chog‘ida madaniyat va san’at sohasidagi hamkorlikni yanada kengaytirish, O‘zbekiston va Gretsiyada faoliyat yuritayotgan madaniy markazlar ishini rivojlantirish, shuningdek, har ikki mamlakatda istiqomat qilayotgan o‘zbek va grek diasporalari bilan madaniy aloqalarni mustahkamlash yuzasidan fikr almashildi. Qayd etilganidek, diasporalar ikki xalq o‘rtasidagi do‘stlik va o‘zaro anglashuvni mustahkamlashda muhim o‘rin tutadi.

Tomonlar Hamkorlik dasturining amaliy ijrosini ta’minlash maqsadida qo‘shma “Yo‘l xaritasi”ni ishlab chiqishga kelishib oldilar. Ushbu hujjat doirasida har bir yo‘nalish bo‘yicha aniq muddatlar, mas’ul tashkilotlar va amalga oshiriladigan tadbirlar belgilanishi ko‘zda tutilmoqda.

Shuningdek, muzokaralarda “Gretsiyada O‘zbekiston madaniyati haftaligi” hamda “O‘zbekistonda Gretsiya madaniyati haftaligi”ni muntazam ravishda tashkil etish tashabbusi ilgari surildi. Mazkur madaniy tadbirlar doirasida milliy musiqa va raqs san’ati namunalari, teatr tomoshalari, tasviriy san’at ko‘rgazmalari, kino kunlari, milliy hunarmandchilik va gastronomiya namoyishlari o‘tkazilishi rejalashtirilmoqda. Bu esa ikki xalqning boy madaniy merosi va zamonaviy san’atini keng jamoatchilikka tanishtirishga xizmat qiladi.

Uchrashuv davomida muzeylar o‘rtasida strategik sheriklikni yo‘lga qo‘yish, tarixiy va madaniy merosni asrash borasida tajriba almashish, qo‘shma ko‘rgazmalar tashkil etish hamda restavratsiya yo‘nalishida hamkorlikni kengaytirish masalalari ham muhokama qilindi.

Arxeologiya sohasidagi hamkorlikni rivojlantirish masalasiga alohida e’tibor qaratilib, O‘zbekiston va Gretsiya olimlari ishtirokida qo‘shma arxeologik ekspeditsiyalar tashkil etish yuzasidan kelishuvga erishildi. Mazkur tashabbus qadimiy sivilizatsiyalar tarixini chuqurroq o‘rganish, ilmiy izlanishlarni kengaytirish va yangi tarixiy topilmalarni xalqaro ilmiy jamoatchilikka taqdim etishga xizmat qilishi qayd etildi.

Madaniyat va kino sohasidagi istiqbolli loyihalar qatorida Iskandar Makedonskiy hamda Roksana tarixiga bag‘ishlangan qo‘shma badiiy film yaratish tashabbusi ham ilgari surildi. Tomonlar ushbu loyiha tarixiy voqealarni zamonaviy kino san’ati orqali xalqaro auditoriyaga yetkazish, shuningdek, ikki mamlakat kinoijodkorlari o‘rtasidagi hamkorlikni mustahkamlash uchun muhim ahamiyat kasb etishini ta’kidladilar.

Bundan tashqari, madaniy va kreativ industriyalar yo‘nalishida ham yangi qo‘shma loyihalarni amalga oshirish, yosh ijodkorlar, dizaynerlar, musiqachilar va san’at vakillari o‘rtasida almashinuv dasturlarini yo‘lga qo‘yish, innovatsion madaniy tashabbuslarni qo‘llab-quvvatlash yuzasidan ham fikr almashildi.

Uchrashuv yakunida tomonlar bildirilgan barcha tashabbuslar O‘zbekiston va Gretsiya o‘rtasidagi madaniy hamkorlikni mazmunan boyitish, tarixiy va madaniy rishtalarni yanada mustahkamlash, ikki qadimiy sivilizatsiya o‘rtasidagi o‘zaro ishonch va do‘stlikni yangi bosqichga olib chiqishga xizmat qilishiga ishonch bildirdilar.
 
Qayd etilganidek, imzolanadigan yangi Hamkorlik dasturi ikki davlatning madaniyat, san’at, ilm-fan va kreativ sohalardagi uzoq muddatli strategik sherikligini yanada mustahkamlash uchun muhim poydevor vazifasini bajaradi.