Unda bu tanlov aynan siz uchun!

O‘zbekiston Respublikasi Vazirlar Mahkamasi huzuridagi Migratsiya agentligi hamda O‘zbekiston Respublikasi Madaniyat vazirligi hamkorligida xorijda mehnat faoliyatini amalga oshirayotgan O‘zbekiston Respublikasi fuqarolari va vatandoshlar o‘rtasida “Vatan sadosi” respublika ko‘rik-tanlovi o‘tkazilmoqda.

Tanlov milliy qo‘shiqchilik va cholg‘u ijrochiligi san’atini targ‘ib qilish, iste’dodli yurtdoshlarimizni qo‘llab-quvvatlash hamda ularning ijodiy salohiyatini namoyon etish maqsadida tashkil etilgan.

Tanlovda xorijda mehnat qilayotgan 18 yoshdan 45 yoshgacha bo‘lgan O‘zbekiston Respublikasi fuqarolari hamda kelib chiqishi o‘zbekistonlik bo‘lgan xorijiy davlat fuqarolari — ya’ni, vatandoshlar ishtirok etishlari mumkin.

G‘oliblar quyidagi tartibda taqdirlanadi:

•  Birinchi o‘rin — tanlov kubogi, birinchi darajali diplom, statuetka va 100 million so‘m pul mukofoti;
•  Ikkinchi o‘rin — ikkinchi darajali diplom, statuetka va 80 million so‘m pul mukofoti;
•  Uchinchi o‘rin — uchinchi darajali diplom, statuetka va 50 million so‘m pul mukofoti.

Shoshiling! Tanlov uchun arizalar iyul oyining oxiriga qadar qabul qilinadi.

G‘oliblar esa O‘zbekiston Respublikasi Mustaqilligi bayrami arafasida tantanali ravishda e’lon qilinadi.

Tanlovda ishtirok etish uchun avval Migratsiya agentligining xorijda ish.uz platformasidan ro‘yxatdan o‘tish va ariza topshirish talab etiladi.

Arizada ishtirok yo‘nalishi tanlanadi. Eslatib o‘tamiz, har bir ishtirokchi yoki jamoa faqat bitta yo‘nalish bo‘yicha qatnashishi mumkin.

So‘ngra ijro etilgan asar nomi kiritiladi va jonli ijro qilingan video tayyorlanadi.

Video YouTube, Instagram, Telegram, TikTok, Facebook, VK, Odnoklassniki, Rutube yoki Google Drive platformalaridan birida joylashtirilib havola arizadagi “Video havolasi” maydoniga kiritiladi.

Muhimi! Video jonli ijro qilingan, montajsiz, kesilmagan va bir butun holatda bo‘lishi shart. Ishtirokchining yuzi va ovozi aniq ko‘rinib turishi lozim. Sun’iy intellekt yordamida yaratilgan yoki tahrirlangan videolar qabul qilinmaydi.

Ishtirokchilarni saralash Madaniyat vazirligi tomonidan tashkil qilingan maxsus komissiya a’zolari tomonidan o‘tkaziladi. Dastlabki saralashdan muvaffaqiyatli o‘tgan ishtirokchilar uchun qo‘shimcha jonli ijroni tekshirish bosqichi o‘tkaziladi. Bu jarayon Zoom yoki Google Meet orqali tashkil etiladi.

O‘z iste’dodingizni namoyon eting, milliy san’atimizni dunyo sahnalarida yanada keng targ‘ib qiling va “Vatan sadosi” respublika ko‘rik-tanlovining g‘olibi bo‘ling!

Ishtirok etish uchun xorijda ish.uz platformasidan hoziroq ro‘yxatdan o‘ting va ariza to‘ldiring.

“Vatan sadosi” — Vatan mehrini san’at orqali ifoda eting!