O‘zbekiston Respublikasi Madaniyat vazirligi

Bugun, 21-iyun kuni O'zbekiston Respublikasi Oliy Majlisi va Qirg'iziston Respublikasi Jogorku Keneshi o'rtasida hamkorlik bo'yicha parlamentlararo komissiyaning to'rtinchi majlisi bo'lib o'tdi. Unda, O'zbekiston madaniyat vaziri o'rinbosari Murodjon Majidov ishtirok etdi.
 
Tomonlar O'zbekiston-Qirg'iziston munosabatlarining bugungi holati va uni rivojlantirish istiqbollarini, shu jumladan, parlamentlararo hamkorlikning keyingi ustuvor yo'nalishini, shuningdek, ikki mamlakat o'rtasida savdo-iqtisodiy, investitsion va madaniy-gumanitar hamkorlikni rivojlantirishda parlament diplomatiyasi imkoniyatlaridan foydalanish masalalari muhokama qilindi.

Komissiyaning O'zbekiston tomonidan hamrais, O'zbekiston Respublikasi Oliy Majlisi Senati Raisining birinchi o'rinbosari Sodiq Safoyev davlat rahbarlarining siyosiy irodasi tufayli so'nggi yillarda ikki mamlakat o'rtasidagi o'zaro ishonch va yaxshi qo'shnichilik tamoyillariga asoslangan munosabatlarni mustahkamlash hamda kengaytirishga qaratilgan muhim qarorlar qabul qilingani ta’kidlandi.

Hamraislar tashqi siyosiy idoralar o'rtasidagi hamkorlikni davom ettirish va ikki tomonlama munosabatlarning dolzarb masalalari, tomonlarni qiziqtirgan xalqaro va mintaqaviy muammolar bo'yicha muntazam maslahatlashuvlar o'tkazish muhimligini yana bir bor tasdiqladi.

Tomonlar mazkur Komissiya doirasidagi parlamentlararo hamkorlikning, shuningdek, parlament delegatsiyalari va ikki mamlakat parlamentlari do'stlik guruhlarining o'zaro tashriflarini qayd etdi.

Qonun hujjatlarini ishlab chiqish va qabul qilish amaliyotini o'rganish, shuningdek qonun ijodkorligi faoliyati, parlamentlarning nazorat va vakillik funksiyalarini amalga oshirish tajribasini takomillashtirish maqsadida O'zbekiston Respublikasi va Qirg'iziston Respublikasi parlamentlari o'rtasida doimiy aloqalarni rivojlantirish zarurligi ta'kidlandi.

Shu nuqtai nazardan, tomonlar yuksak darajada erishilgan kelishuvlarni o'z vaqtida amalga oshirishda ikki tomonlama hamkorlik bo'yicha Hukumatlararo qo'shma komissiya muhim rol o'ynashini ta'kidladi.

Fan, ta'lim, sog'liqni saqlash, turizm, sport, madaniyat va san'at sohalarida qo'shma loyiha va dasturlarni amalga oshirish masalalari alohida muhokama qilindi.

Majlis davomida Murodjon Majidov ikki davlat o'rtasida madaniyat sohasidagi hamkorlik jadal rivojlanib borayatganligini, xususan, madaniyat kunlarini o'tkazish an'anaga aylanganini ta'kidladi.

Joriy yilning iyul oyida O'zbekistonda “Qirg'iziston madaniyat kunlari”ni yuqori saviyada o'tkazish bo'yicha tegishli ishlar amalga oshirilayotganini ta'kidlab o'tdi.

“O'ylaymanki, joriy yildagi hamkorligimiz, ikki tomonlama madaniy hamkorligimiz tarixidagi eng muhim va voqealarga boy yillardan biri bo'ladi”
- dedi Murodjon Majidov.

Majlis yakunida tomonlar o'zaro kelishuv asosida O'zbekiston Respublikasi Oliy Majlisi va Qirg'iziston Respublikasi Jogorku Keneshi o'rtasida hamkorlik bo'yicha Parlamentlararo komissiyaning beshinchi majlisi muddatlari xususida kelishuvga erishdi.