So‘nggi yillarda O‘zbekiston va Gruziya o‘rtasidagi hamkorlik barcha sohalarda, jumladan madaniyat va san’at yo‘nalishida ham izchil rivojlanib bormoqda. Gruziya O‘zbekistonning Kavkaz mintaqasidagi muhim va yaqin hamkorlaridan biri hisoblanadi.

Bugungi kunda O‘zbekiston va Gruziya o‘rtasidagi madaniy hamkorlik tobora kengayib borayotganini ikki davlatda tashkil etilayotgan xalqaro tadbirlarda san’atkorlarimizning faol ishtirokida ham yaqqol ko‘rish mumkin.

Xususan, O‘zbekistonda o‘tkazib kelinayotgan “Lazgi” xalqaro raqs festivali, Baxshichilik san’ati xalqaro festivali kabi yirik xalqaro madaniy tadbirlarda Gruziya san’atkorlari muntazam ishtirok etib kelmoqda. Shuningdek, teatrlar o‘rtasidagi hamkorlik ham rivojlanib bormqoda. Ushbu hamkorlikni yanada rivojlantirish maqsadida, O‘zbekistonda 9-11-mart kunlari “Gruziya madaniyati kunlari” tadbirlari bo‘lib o‘tmoqda.

Madaniyat kunlari doirasida bugun, 9-mart kuni Madaniyat vazirligida O‘zbekiston madaniyat vaziri Ozodbek Nazarbekov hamda Gruziya madaniyat vaziri Tinatin Rukhadze xonim o‘rtasida hamkorlik uchrashuvi bo ‘lib o‘tdi. Uchrashuv davomida bir qator hamkorlik masalalari muhokama etildi.  

Shu bilan birga, bugun poytaxtdagi Alisher Navoiy nomidagi O‘zbekiston davlat akademik katta teatrida O‘zbekistonda “Gruziya madaniyati kunlari”ning ochilish marosimi bo‘lib o‘tdi. Unda, O‘zbekiston madaniyat vaziri Ozodbek Nazarbekov, Gruziya madaniyat vaziri Tinatin Rukhadze xonim, Gruziyaning O‘zbekistondagi elchixonasi vakillari hamda gruzin san’ati ixlosmandlari ishtirok etishdi.  

“Gruziya madaniyati kunlari”ning rasmiy ochilish marosimiga bag‘ishlangan  gala-konsert dasturi “Madaniyatlar muloqoti: O‘zbekiston va Gruziya - asrlar merosi va zamon nafasi” deya nomlandi.  

Konsertda O‘zbekistonning “Tumor” raqs ansambli hamda Gruziyaning “Erisioni” davlat akademik xalq ashula va raqs ansambli o‘z san’atlarini namoyish etishdi.

Shuningdek, madaniyat kunlari davomida 10-11-mart kunlari poytaxtdagi O‘zbekiston Milliy kino saroyida gruzin badiiy filmlar namoyishi bo‘lib o‘tadi. Namoyishda gruzin kinolaridan: “To‘y”, “Soyabon”, “Musiqachilar”, “Gʻalati odamlar” kabi turli janrdagi filmlar namoyish etiladi.
Eslatib o‘tamiz, 2024-yilning 9-12-iyul kunlari Gruziyaning Tbilisi shahrida “O‘zbekiston madaniyati va kino kunlari” tadbirlari tashkil etilgan edi.  Unda, o‘zbekistonlik san’atkorlar va raqqosalar ishtirokida gala-konsert dasturi va kinofilmlar namoyishi tashkil etilgan.