Madaniyat vaziri Ozodbek Nazarbekov Andijondagi Alisher Navoiy haykali poyiga gul qo‘yish marosimida ishtirok etdi
2026-02-10 09:15:00 / Yangiliklar
Andijon shahrida buyuk mutafakkir, so‘z mulkining sultoni Alisher Navoiy tavalludining 585 yilligiga bag‘ishlangan “Hazrat Navoiyga ehtirom” nomli ma’naviy-ma’rifiy tadbir bo‘lib o‘tdi.
Tadbir avvalida viloyat hokimi Shuhratbek Abdurahmonov, Xalqaro Turkiy madaniyat tashkiloti — TURKSOY Bosh kotibi Sulton Rayev, O‘zbekiston Respublikasi madaniyat vaziri Ozodbek Nazarbekov, shuningdek, davlat va jamoat tashkilotlari rahbarlari, adabiyotshunos olimlar, ziyolilar hamda talaba-yoshlar ishtirokida Alisher Navoiy haykali poyiga gullar qo‘yilib, ulug‘ mutafakkir xotirasiga chuqur ehtirom ko‘rsatildi.
Anjumanda so‘zga chiqqanlar Alisher Navoiyning hayoti va ijodi, uning bebaho adabiy merosi, insonparvarlik g‘oyalari bilan yo‘g‘rilgan asarlarini o‘rganish va targ‘ib etish borasida mamlakatimizda keng ko‘lamli ishlar amalga oshirilayotganini ta’kidladilar.
Bu kabi tashabbuslar aholi, ayniqsa, yoshlar o‘rtasida adabiyotga qiziqishni oshirish, vatanparvarlik tuyg‘ularini mustahkamlash va ma’naviy kamolotni yuksaltirishga xizmat qilayotgani qayd etildi.
Shuningdek, tadbir doirasida viloyat madaniyat boshqarmasi tasarrufidagi ijodiy jamoalar tomonidan Alisher Navoiyning hayoti va faoliyatini aks ettiruvchi sahna ko‘rinishlari namoyish etildi. Ulug‘ shoir g‘azallari asosida yaratilgan qo‘shiqlar ijro qilinib, tadbir ishtirokchilariga yuksak badiiy zavq bag‘ishladi.