Bugun, 10-fevral kuni Andijon viloyatida navbatdagi kengaytirilgan Hay’at yig‘ilishida madaniyat va san’at sohasida 2025-yilda amalga oshirilgan ishlar tahlil qilindi, mavjud muammolar ochiq aytildi va 2026-yil uchun aniq vazifalar belgilab olindi.

 

Hay’at yig‘ilishida O‘zbekiston Respublikasi madaniyat vaziri Ozodbek Nazarbekov, Qoraqalpog‘iston Respublikasi madaniyat vaziri Begis Temirbayev, O‘zbekiston Madaniyat vazirligi rahbariyati hamda markaziy apparati vakillari, hududiy va tizim tashkilotlari rahbarlari, shuningdek, hududiy studiyalardan tizim tashkilotlari vakillari onlayn ishtirok etishdi.

 

Dastlab, Hay’at yig‘ilishi boshlanishidan oldin Andijon viloyati hokimi Shuhratbek Abdurahmonov ishtirok etib, 2025-yil davomida madaniyat va san’at sohasida bir qator ijobiy ishlar amalga oshirilayotganligini ta’kidladi.

 

Xususan, Andijon 2026-yil — “Turkiy dunyoning madaniy poytaxti” doirasida o‘tkaziladigan keng qamrovli tadbirlar rejasi muhokama etildi.

 

“Bugun biz madaniyat va san’at sohasida 2025-yilda amalga oshirilgan ishlar natijalari tahlil qilinib, mavjud kamchiliklarga xolis baho berish hamda 2026-yil uchun ustuvor vazifa va aniq rejalarni belgilab olindi.

Davlatimiz rahbari, muhtaram Shavkat Mirziyoyev tomonidan ilgari surilgan tashabbus natijasida 2025-yilda madaniyat va san’at sohasida tub islohotlar amalga oshirildi.

Jumladan, madaniy tadbirlar tizimli ravishda tashkil qilindi, yangi saviyali sahna asarlari yaratildi, madaniyat muassasalarining moddiy-texnik bazasi mustahkamlandi.

Soha boshqaruvi va aholiga madaniy xizmat ko‘rsatishda IT va sun’iy intellekt texnologiyalaridan foydalanish ko‘lami kengaydi.

O‘zbek madaniyati dunyo sahnalarida keng targ‘ib etildi, san’at ustalari va yosh ijodkorlar xalqaro tanlov va festivallarda nufuzli o‘rinlarni egalladi.

Natijada, madaniyat va san’at nafaqat ijtimoiy hayotimizning muhim tarkibiy qismi sifatida, balki jamiyat ma’naviy taraqqiyotini ta’minlovchi soha sifatida mustahkam o‘rin egallab bormoqda” – dedi vazir Ozodbek Nazarbekov.

 

So‘ng, vazir kotibiyati mudiri Ozodbek Yo‘ldoshov 2025-yil davomida madaniyat va san’at sohasida amalga oshirilgan ishlar haqida hisobot qildi.

Unda, teatrlar yo‘nalishida, nomoddiy madaniy meros, ko‘zi ojizlar kutubxonalari va madaniyat markazlari, konsert-tomosha faoliyati, ta’lim muassasalari, ijodkor yoshlar, ijro intizomi, sohani raqamlashtirish, moliya-xo‘jalik faoliyati, davlat-xususiy sherikchilik yo‘nalishi, jismoniy va yuridik shaxslarning murojaatlari kabi masalalar ko‘rib chiqildi.

So‘ng, har bir hudud va tizim tashkiloti rahbari soha yuzasidan 2025-yilda amalga oshirilgan ishlar yuzasidan to‘liq hisobotlar berdi. Har bir hudud va tashkilot o‘z faoliyati bo‘yicha taqdimot qildi, taklif va tashabbuslar bildirdi.

“Aytishim kerak, hisobotlar orqali sohadagi holat, yutuqlar bilan bir qatorda, kamchilik va muammolar ham namoyon bo‘ldi.

2025-yil madaniyat va san’at sohasi uchun mas’uliyatli yil bo‘ldi. Davlatimiz rahbari tomonidan sohani yangi bosqichga olib chiqish bo‘yicha aniq vazifalar belgilab berildi.

Hududiy madaniyat organlari va tizim tashkilotlar ushbu vazifalarni to‘g‘ri anglab, tashabbus bilan ishlaganini ko‘rdik. Yangi loyihalar va aholiga madaniy xizmat ko‘rsatish bo‘yicha ijobiy tajribalar bor.

Biroq, ayrim rahbarlar hali-hamon eskicha ish uslubidan voz kechmagan, natija haqida yetarlicha o‘ylamayapti.

Bugungi hisobotlar yana bir bor shuni ko‘rsatdiki, hududlar o‘rtasidagi farq juda katta. Bir hududda ish tizimli va tashabbuskor, boshqasida esa bir xil sharoit bo‘lishiga qaramasdan natija yo‘q.

Bu farqning asosiy sababi – rahbarning pozitsiyasi, talabchanligi va mas’uliyatidir.

Barcha rahbarlar bir narsani aniq tushunib olishi lozim, endi faqat hisobot emas, aniq natija talab qilinadi.

Biz madaniyat va san’at sohasini haqiqatan ham jamiyat taraqqiyotining drayveriga aylantirishni istasak, har birimiz mas’uliyat va shaxsiy javobgarlikni ikki karraga oshirishimiz shart” – dedi vazir.

 

2025-yilda amalga oshirilgan ishlar natijadorligi tahlili yuzasidan yaxshi an’anaga aylanayotgan hududiy madaniyat organlari faoliyatini rag‘batlantirildi. Unga ko‘ra, 2025 yil yakunlari bo‘yicha ijobiy natija ko‘rsatgan, reytingda birinchi uch o‘rinni egallagan quyidagi hududlar rag‘batlantirildi:

1-Navoiy viloyati madaniyat boshqarmasiga 500 million;

2-Qoraqalpog‘iston Respublikasi Madaniyat vazirligiga 400 million;

3-Farg‘ona viloyati madaniyat boshqarmasiga 300 million so‘m berildi.

 

“Bu – boshqalar uchun ham aniq signal bo‘lsin, tashabbus va natija bor joyda qo‘llab-quvvatlash bo‘ladi” – deya ta’kidladi vazir.

 

Shuningdek, yangi tayinlovlar bilan sog‘a vakillari tanishtirildi.

Madaniyat vazirining raqamli texnologiyalar va sun’iy intellekt texnologiyalarini rivojlantirish masalalari bo‘yicha maslahatchisi etib tayinlangan Nabiyev Abduraufbek Abdurazzoq o‘g‘li;

 

Shuningdek, Madaniyat vazirligi Sun’iy intellektni rivojlantirish bo‘limi boshlig‘i etib tayinlangan Nosirov Amirjon Axmadjon o‘g‘li;

 

Teatr, sirk san’ati va kinematografiya sohasi faoliyatini muvofiqlashtirish bo‘limi boshlig‘i v.v.b etib tayinlangan Elmurodov Farhod Ismatilloyevich tanishtirildi.

 

Hay’at yig‘ilishi yakunida, vazir Ozodbek Nazarbekov Xalqaro turkiy madaniyat tashkiloti — TURKSOY mukofoti bilan taqdirlanganlarni e’lon qilib, ularni taqdirladi.

 

Madaniyat vaziri o‘rinbosari Murodjon Majidov Abdullayevich – Xalqaro turkiy madaniyat tashkiloti — TURKSOYning “Oltin” medali bilan;

 

O‘zbekiston davlat filarmoniyasi Bosh direktori Tajiboyev Anvarjon Yo‘ldashevich – “TURKSOY medali” bilan taqdirlandi.

 

“Bugungi kengaytirilgan Hay’at yig‘ilishida madaniyat va san’at sohasida 2025 yilda amalga oshirilgan ishlar tahlil qilindi, mavjud muammolar ochiq aytildi va 2026-yil uchun aniq vazifalar belgilab olindi.

Ko‘rib turganingizdek, hali oldimizda qilinishi kerak bo‘lgan vazifalar va ishlar juda ko‘p.

2026-yil madaniyat va san’at sohasida natija, intizom va sifat yili bo‘lishi shart. Har bir hudud va har bir tashkilotda bu tamoyil hayotga tatbiq etilishi kerak.

Berilgan barcha topshiriqlar ijrosi vazirlik tomonidan qat’iy nazoratga olinadi. Yaxshi natija ko‘rsatganlar rag‘batlantiriladi, sust ishlaganlar esa tegishli tartibda javobgarlikka tortiladi.

Barchangizdan yuqori mas’uliyat, faol pozitsiya va tashabbuskorlik kutib qolaman.

Shu bilan Madaniyat vazirligi Hay’atining kengaytirilgan yig‘ilishini yakunlangan deb e’lon qilaman” – deya ta’kidladi vazir Ozodbek Nazarbekov.