O‘zbekiston va Ozarbayjon o‘rtasidagi munosabatlar tarixiy, madaniy, til va an’analar jihatidan chuqur ildizlarga egadir. Ikki davlatni nafaqat geosiyosiy manfaatlar, balki umumiy madaniy meros, qadriyatlar va turkiy xalqlarga xos birlik ruhi bog‘lab turadi. Madaniy hamkorlik ikki xalq o‘rtasida o‘zaro hurmat va do‘stlikni yanada mustahkamlashda muhim o‘rin tutadi.

Bu ikki xalq tarixiy ildizlar va madaniy yaqinlik bilan chambarchas bog‘langan bo‘lib, har ikki xalq islom dini, turkiy qadriyatlar va umumiy tarixiy meros asosida shakllanganligi bilan ajralib turadi.

O‘zbekiston va Ozarbayjon o‘rtasidagi madaniy munosabatlar bugun paydo bo‘lgan emas, uning tarixiy ildizlari Nizomiy Ganjaviy, Alisher Navoiy, Jomiy va boshqa buyuk mutafakkirlar davriga borib taqaladi. Shuningdek, “Ipak yo‘li” orqali Ozarbayjon va O‘zbekiston shaharlari o‘rtasida iqtisodiy va madaniy aloqalar yuzlab yillar davom etgan. Bu madaniy bog‘lanishlar hozirgi kunda ham rivojlanib bormoqda.

            Ma’lumot o‘rnida, O‘zbekiston Respublikasi Hukumati va Ozarbayjon Respublikasi Hukumati o‘rtasida 1996-yilda imzolangan Gumanitar hamkorlik to‘g‘risidagi bitimga asosan ikki davlat o‘rtasida madaniy hamkorlik aloqalari olib borilmoqda.

So‘nggi yillarda ikki davlat o‘rtasida turli madaniy tadbirlar muntazam ravishda tashkil etib kelinmoqda. Jumladan: O‘zbekistonda Ozarbayjon madaniyati kunlari, Ozarbayjonda O‘zbekiston madaniyati kunlari, qo‘shma teatr festivallari, xalqaro festivallar, kino namoyishlari va ko‘rgazmalar, oliygohlar o‘rtasida talabalar almashinuvi, qo‘shma ilmiy tadqiqotlar, konferensiyalar va seminarlar faol yo‘lga qo‘yilgan.

O‘zbekiston va Ozarbayjon o‘rtasidagi madaniy hamkorlik xalqlar o‘rtasidagi do‘stona munosabatlarni mustahkamlash, umumiy qadriyatlarni asrash va yangi avlodga yetkazishda muhim omildir. Turkiy xalqlarning yagona madaniy maydonida bu ikki davlatning roli muhim bo‘lib, kelgusida ham hamkorlik kengayib, yangi qo‘shma loyihalarga yo‘l ochilishi shubhasizdir.

Ikki davlatning madaniy hamkorligini yanada mustahkamlash maqsadida, O‘zbekiston va Ozarbayjon Madaniyat vazirliklari bilan hamkorlikda 2025-yilning 13 – 20 - dekabr kunlari Ozarbayjon Respublikasi Boku va Fuzuliy shaharlarida “O‘zbekiston madaniyati kunlari” doirasida san’at ustalari ishtirokida konsert dasturi, “Yangi O‘zbekiston” foto ko‘rgazmasi tashkil etilmoqda.

Ozarbayjonda o‘tkaziladigan “O‘zbekiston madaniyat kunlari” tadbirlariga 170 nafardan ziyod O‘zbekiston Respublikasi delegatsiyasiga (O‘zbekiston xalq artistlari, O‘zbekiston xizmat ko‘rsatgan artistlar, O‘zbekiston davlat simfonik orkestiri, Maqom ansambli, “Navro‘z” raqs ansambli va boshqalar) O‘zbekiston madaniyat vazirining birinchi o‘rinbosari Bahodir Ahmedov boshchilik qilmoqda.

Madaniyat kunlari doirasida, O‘zbekiston va Ozarbayjon Madaniyat vazirliklari rahbariyati bilan uchrashuvlar, O‘zbekiston va Ozarbayjon qo‘shma madaniy komissiyasining 1-majlisi, Ozarbayjon madaniy muassasalariga tashrif, Haydar Aliyev markazida “O‘zbekiston madaniyati kunlari” tadbirlarining tantanali ochilish marosimiga bag‘ishlangan konsert dasturi namoyishi, Turkiy madaniyat va meros jamg‘armasi rahbari bilan uchrashuv, “Navro‘z” raqs ansamblining konsert dasturi namoyishi, Ozarbayjon davlat filarmoniyasida “O‘zbekiston madaniyati kunlari” doirasida O‘zbekiston davlat simfonik orkestrining konsert dasturi namoyishi, Fuzuliy shahridagi Mirzo Ulug‘bek umumta’lim maktabida “O‘zbekiston madaniyati kunlari” doirasidagi tadbirlarning yopilish marosimiga bag‘ishlangan konsert dasturi jarayonlari bo‘lib o‘tishi rejalashtirilgan. 

 Ma’lumot uchun: 2023-yilda Boku shahrida “O‘zbekiston madaniyati kunlari” 2024-yilda Toshkent shahrida “Ozarbayjon madaniyati kunlari” tadbirlari yuqori saviyada o‘tkazilgan. Shuningdek, 2024-yilda Ozarbayjon Respublikasi Prezidentining O‘zbekiston Respublikasiga rasmiy tashrifi davomida ikki davlat rahbarlari ishtirokida O‘zbekiston va Ozarbayjon san’at ustalari tomonidan “Do‘stlik oqshomi” konsert dasturlari o‘tkazilgan.

 

O‘zbekiston va Ozarbayjon Respublikalari o'rtasidagi madaniyat sohasida hamkorlik xronologiyasi.

 

2022-yil 10-15-aprel kunlari Termiz shahrida “Ozarbayjon madaniyati va adabiyoti kunlari” tashkil etildi.

2022-yil 22-26-sentyabr kunlari O‘zbekiston Davlat simfonik orkestrining Ozarbayjondagi gastrol safari uyushtirildi.

2022-yil 14-18-noyabr kunlari Boku shahrida “O‘zbekiston madaniyat kunlari” tashkil etildi.

2022-yil 12-14-dekabr kunlari Ozarbayjon vakillari Toshkentda o‘tkazilgan Mustaqil Davlatlar Hamdo‘stligi mamlakatlari Ilmiy va ijodiy ziyolilari forumida qatnashdilar.

2023-yil 6-8-may kunlari Guliston shahrida o‘tkazilgan Xalqaro baxshichilik san’ati festivalida Ozarbayjon vakillari ishtirok etdilar.

2023-yil 10-may kuni Toshkentda Ozarbayjonning birinchi prezidenti Heydar Aliyev tavalludining 100 yilligi keng nishonlandi.

2023-yil 1-4-avgust kunlari Boku shahrida “O‘zbekiston madaniyat kunlari” yuqori darajada tashkil etildi.

2023-yil 21-23-sentyabr kunlari Qo‘qon shahrida o‘tkazilgan Xalqaro hunarmandchilik festivalida Ozarbayjon vakillari ishtirok etdi.

2023-yil 11-13-oktyabr kunlari Boku shahrida o‘tkazilgan “Qorqut ota” Uchinchi turkiy dunyo kinofestivalida o‘zbek rejissyorlari eng yaxshi ssenariy va hujjatli film nominatsiyalarida mukofotga sazovor bo‘ldilar.

2023-yil 9-11-dekabr kunlari Shusha shahrida “Shusha – 2023 yil turkiy dunyoning madaniyat poytaxti” tadbirlarida O‘zbekiston madaniyat vazirligi ijodiy jamoasi qatnashdi.

2024-yilning 23-26-yanvar kunlari Boku shahrida “O‘zbekiston fan va madaniyat kunlari” tashkil etildi.

2024-yil 17-mart kuni Boku shahrida O‘zbekiston Milliy maqom san’ati markazining Y. Rajabiy nomidagi maqom ansambli konsert berdi.

2024-yil 9-11-may kunlari Boku shahrida bo‘lib o‘tgan “Shusha – 2024-yil Islom madaniyati poytaxti” tadbirlarida O‘zbekiston madaniyat vaziri O.Nazarbekov boshchiligidagi delegatsiya ishtirok etdi.

2024-yil 10-14-iyun kunlari Toshkent shahrida “Ozarbayjon madaniyati kunlari” tashkil etildi.

2024-yil 20-23-iyul kunlari Boku shahrida “O‘zbekiston kino kunlari” bo‘lib o‘tdi.

2024-yilning 23-avgust kuni Toshkent shahrida “O‘zbekiston va Ozarbayjon do‘stlik konserti” tashkil etildi.

Tadbirlar doirasida O‘zbekiston Prezidenti tomonidan P.Bulbulo‘g‘liga “O‘zbekiston xalq artisti”, Ozarbayjon Prezidenti tomonidan F.Zokirovga “Ozarbayjon xalq artisti” faxriy unvonlari topshirildi.

2024-yilning 26-30-avgust kunlari Samarqand shahrida o‘tkazilgan “Sharq taronalari” xalqaro musiqa festivalida Ozarbayjonning “Semurg‘” guruhi festivalning Gran-pri mukofotini qo‘lga kiritdi.

2024-yilning 14-16-noyabr kunlari Boku shahrida o‘tkazilgan BMT Iqlim o‘zgarishi masalalari bo‘yicha konferensiyasida madaniyat vaziri O.Nazarbekov boshchiligidagi delegatsiya qatnashdi.

2025-yilning 18-20-mart kunlari Yu.Rajabiy nomidagi O‘zbek milliy musiqa san’ati institutida Ozarbayjon xalq artisti Z.Nabizade, Ozarbayjonda xizmat ko‘rsatgan artistlar H.Mamedov hamda S.Pashazade tomonidan mahorat darsi va konsert dasturi o‘tkazildi.

2025-yilning 21-mart kuni Toshkent shahrida o‘tkazilgan “Navro‘z” bayramida Ozarbayjon vakili qatnashdi.

2025 yilning 26-28 aprel kunlari Xiva shahrida o‘tkazilgan Xalqaro baxshichilik san’ati festivali  tanlov yakunlariga ko‘ra “Ozarbayjon oshiqlari” guruhi Gran-pri mukofotiga sazovor bo‘ldi.

2025-yilning 26-28-may kunlari Samarqandda o‘tkazilgan “Samarqand – 2025-yilda islom dunyosi madaniyat poytaxti” tadbirlarida Ozarbayjon madaniyat vaziri o‘rinbosari M.Guseynov boshchiligidagi delegatsiya qatnashdi.

2025-yilning 19-22-iyun kunlari Boku shahrida o‘tkazilgan “Viva Azerbayjan” festivalida “Tomosha” guruhi qatnashib, gran-pri sohibi bo‘ldi.

2025-yilning 2-3-iyul kunlari madaniyat vaziri Ozodbek Nazarbekov Boku shahriga tashrif buyurib, Ozarbayjon madaniyat vaziri Adil Kerimli bilan uchrashuv o‘tkazdi. Unda Mug‘om san’ati markazi direktori Sahib Pashazada va parlament qo‘mita raisi o‘rinbosari Gyunay Efendiyevaga “O‘zbek madaniyati elchisi” unvoni  berildi. Albatta bu munosabatlar ikki xalq o‘rtasidagi madaniy aloqalarning ishonch va do‘stlik asosida qurilganligining ifodasidir.

Azaldan tarixi, tili va dini, urf-odat va an’analari, bugungi orzu-intilishlari mushtarak bo‘lgan xalqlarimiz o‘rtasida do‘stlik va hamjihatlik munosabatlarini mustahkamlashda o‘tkazilayotgan madaniyat kunlarining ulkan o‘rni hamda ahamiyati bor.