“Bahor” raqs ansambli 5 yillik yubileyini nishonladi
2025-12-19 15:55:00 / Yangiliklar
Joriy yilning 13-dekabr kuni Mukarrama Turg‘unboyeva nomidagi “Bahor” davlat raqs ansambli Kasaba uyushmalari san’at saroyida o‘zining 5 yillik faoliyatiga bag‘ishlangan yubiley konsertini yuqori saviyada tashkil etdi.
Tantanali kechada madaniyat va san’at sohasi vakillari, raqs san’ati mutaxassislari, taniqli ijodkorlar, ustoz san’atkorlar hamda san’at ixlosmandlari jam bo‘ldi. Konsert dasturida ansambl tomonidan milliy va turli xalq raqs asarlari, o‘zbek raqs san’atining boy an’analari va zamon bilan hamnafas ijodiy izlanishlar namoyish etildi.
Tadbir davomida ansamblning badiiy rahbari — Qoraqalpog‘iston xalq artisti, O‘zbekistonda xizmat ko‘rsatgan artist Ziyoda Madrahimova so‘zga chiqib, “Bahor” davlat raqs ansamblining tashkil topish tarixi, uni qayta tiklash jarayonlari, iste’dodli yosh raqqosalarni jamlash, yangi raqs asarlarini yaratish yo‘lidagi izlanishlar hamda erishilgan ijodiy yutuqlar haqida batafsil to‘xtalib o‘tdi.
Yubiley konserti ansamblning besh yillik samarali faoliyati, professional ijrochilik maktabi va o‘zbek raqs san’atini rivojlantirishga qo‘shayotgan munosib hissasini yaqqol namoyon etdi. Tadbir tomoshabinlarda katta taassurot qoldirib, raqs san’ati bayramiga aylandi.