Vazir Ozodbek Nazarbekov “Yil ayoli – 2025” milliy tanlovi g‘oliblarini taqdirlash marosimida qatnashdi
2025-12-23 17:05:00 / Yangiliklar
Bugun, 23-dekabr kuni Oila va xotin-qizlar qo‘mitasi tomonidan “Yil ayoli” milliy tanlovi hamda “Eng namunali xotin-qizlar faoli” tanlovining Respublika bosqichi g‘oliblarini taqdirlash marosimi bo‘lib o‘tdi.
Tadbirda Bosh vazir o‘rinbosari - Oila va xotin-qizlar qo‘mitasi raisi Zulayho Mahkamova, Oliy Majlis Senati a’zolari, madaniyat vaziri Ozodbek Nazarbekov hamda davlat va jamoat arboblari ishtirok etdi.
O‘zbekistonda xotin-qizlar manfaatlarini himoya qilish, ularni har tomonlama qo‘llab-quvvatlash, gender tenglikni ta’minlash Prezident Shavkat Mirziyoyev rahbarligida davlat siyosatining ustuvor yo‘nalishlaridan biriga aylandi.
Mamlakatimiz ijtimoiy-siyosiy, iqtisodiy hamda ma’naviy hayotida xotin-qizlarning ishtiroki ortib, ular davlat boshqaruvi organlari, parlament va mahalliy kengashlar, tadbirkorlik va ilmiy tadqiqot sohalarida faol ishtirok etmoqda.
So‘nggi sakkiz yil ichida sohada xalqaro standartlarga mos 110 dan ortiq normativ-huquqiy hujjatlar ijro etilmoqda.
Jamiyat hayotida faol ishtirok etayotgan, har jihatdan ibratli xotin-qizlarni aniqlash, ularning faoliyatini keng jamoatchilikka yaqindan tanishtirish hamda ilg‘or ish tajribalarini ommalashtirish maqsadida “Yil ayoli” milliy tanlovi o‘tkazib kelinmoqda.
Joriy yilda “Yil ayoli” tanlovining tuman (shahar) bosqichlarida 3 014 nafar ayollar ishtirok etdi. Tanlovning Qoraqalpog‘iston Respublikasi, viloyatlar va Toshkent shahar bosqichlarida 208 ta tuman (shahar)lardan jami 964 nafar ayollar qatnashib, ulardan 150 nafari Respublika bosqichida ishtirok etish huquqini qo‘lga kiritishdi.
“Yil ayoli – 2025” da 13 nafar ayollar quyidagi nominatsiyalar bo‘yicha taqdirlandilar: “Yilning eng vatanparvar ayoli”; “Yilning eng faol olima ayoli”; “Yilning eng ilg‘or tadbirkor ayoli”; “Yilning eng yaxshi ijodkor ayoli”; “O‘z kasbining ustasi bo‘lgan yil ayoli”; “Yilning eng yaxshi uy bekasi”; “Yilning faol ma’naviy-ma’rifiy targ‘ibotchisi”; “Yilning eng jonkuyar ustozi”; “Yilning eng faol sog‘lom turmush tarzi targ‘ibotchisi”; “Yilning eng yangi g‘oyalar tashabbuskori”; “Xotin-qizlar faoliyatini eng ko‘p targ‘ib etgan OAV vakili”; “Ijtimoiy tashabbuslar yetakchisi”; “Matonatli ayol”.
Oliy o‘rin – gran pri sohibi Prezident sovg‘asi – avtomobil bilan taqdirlandi.
Taqdirlash marosimidan so‘ng, taniqli san’atkorlar ishtirokida konsert dasturi namoyish etildi.