O‘zbekona bag‘rikenglik va insonparvarlik madaniyati nafaqat mamlakatimizda, balki xalqaro miqyosda ham o‘z salohiyatiga ega bo‘lib bormoqda. Millatlararo hamjihatlikni, jamiyatda fuqarolar totuvligini mustahkamlash, barchaga millati va diniy e’tiqodidan qat’iy nazar, teng huquq va imkoniyat yaratish, yosh avlodni vatanparvarlik, milliy va umuminsoniy qadriyatlarga hurmat, Vatanga muhabbat va sadoqat ruhida tarbiyalashda O‘zbekiston tutgan yo‘l eng barqaror va odilona siyosat sifatida baholanyapti. Yurtimizda yaxshi qo‘shnichilik, o‘zaro ishonch va tinchlik yo‘lida hamkorlik borasidagi islohotlar Markaziy Osiyo mintaqasida barqarorlik va hamkorlik muhitini mustahkamlashga ulkan hissa bo‘lib  qo‘shildi.

Davlatimiz rahbarining bundan bir necha yil avval BMT minbaridan turib, Markaziy Osiyoni tinchlik, yaxshi qo‘shnichilik va sheriklik makoniga aylantirishga qat’iy qaror qilingani haqidagi  tashabbusi amalda o‘z tasdig‘ini allaqachon topdi.   Prezidentimizning “Markaziy Osiyo yangi davr ostonasida” maqolasida ta’kidlagan fikr-mulohazalari O‘zbekistonning xalqaro miqyosdagi o‘z pozitsiyasini yanada mustahkamroq egallashi  uchun zamin yaratdi. 

Yaqinda  poytaxtimizda  bo‘lib o‘tgan Markaziy Osiyo davlatlari rahbarlarining yettinchi maslahat uchrashuvi mintaqaviy hamkorlikning mutlaqo yangi davri boshlanishi uchun poydevor bo‘lishiga shubha yo‘q. Unda ilgari surilgan taklif va tashabbuslar mintaqamizning umumiy taraqqiyotiga xizmat qila boshladi. 

 Shu jihatdan olib qaralganda,  AQSHda “S5 + 1” formatida bo‘lib o‘tgan sammitning mazmun-mohiyati ham mamlakatimizning xalqaro miqyosdagi nufuzini oshirishga yo‘naltirildi. Ta’kidlash lozimki, mazkur anjuman Markaziy Osiyo va AQSH o‘rtasidagi strategik muloqotning yangi bosqichini boshlab berish barobarida O‘zbekistonning tinchlikparvarlik siyosatini butun olamga ma’lum qildi. Umuman, mintaqaviy va global aloqalarning yangi imkoniyatlari yaratilishida bunday anjumanlarning ahamiyati juda katta. 

 Yurtimizda 130 dan ortiq  millat va elat vakillari yashab kelmoqda. Mavjud etnik diasporalar tarixi, madaniyati, ma’naviy qadriyatlari, milliy an’analari va urf-odatlarini saqlash, har tomonlama rivojlantirish tamoyillari O‘zbekistonning Bosh qomusi – Konstitutsiyada  ham mustahkamlab qo‘yilgan. Millatlararo totuvlikni rivojlantirish  davlat siyosatida muhim yo‘nalish ekan, bu o‘zbekona bag‘rikenglik va yaxshi qo‘shnichilik an’analari targ‘iboti uchun keng yo‘l ochadi. Dunyoning boshqa mintaqalarida sodir bo‘layotgan noxush  holatlarga, tinchlikni saqlash, o‘zaro  manfaatli hamkorlikni rivojlantirishda bunday siyosat muhim omilga aylanadi, albatta.

Shu kunlarda O‘zbekiston Respublikasi Prezidenti Shavkat Mirziyoyevning Yaponiyaga qilgan rasmiy tashrifi ham xalqaro miqyosda ikki mamlakat o‘rtasidagi ko‘p qirrali hamkorlikni sifat jihatidan yangi pog‘onaga ko‘tarish yo‘lidagi tarixiy va ishonchli qadam bo‘ldi.tashrifdan ko‘zlangan maqsad nihoyatda ko‘lamdor bo‘lib, Toshkent va Tokio o‘rtasidagi munosabatlar nafaqat ikki tomonlama, balki mintaqaviy va global ahamiyatga egadir.Tokio shahrida Yaponiya imperatori Naruxito va Bosh vazir Sanaye Takaichi hamda yetakchi universitet va yirik kompaniyalar rahbarlari bilan uchrashuv o‘tkazishlaridan ko‘zlangan maqsad O‘zbekistonning kunchiqar mamlakat bilan strategik aloqalarini mustahkamlashdan iboratdir.

Bu o‘zaro manfaatli hamkorlikning “Markaziy Osiyo+Yaponiya” dialogi nomini olishi ham mamlakatlarimiz o‘rtasidagi ko‘p tomonlama hamkorlikni rivojlantirishga qaratilgan muhim muloqot platformasi hisoblanadi.

O‘zbekiston Respublikasi va Yaponiya o‘rtasidagi hamkorlik nafaqat iqtisodiy, balki madaniy sohalarda ham davom etayotgani ikki  hamkor davlat o‘rtasidagi do‘stlik rishtalarini yangi va salmoqli bosqichga olib chiqadi.  Jumladan, bu  mamlakat bilan madaniyat va san’atning barcha sohalari, muzeyshunoslik, sayyohlik va boshqa yo‘nalishlardagi hamkorligimiz muhim ahamiyat kasb etib bormoqda.

Jumladan, 2019 yil noyabr oyida Yaponiyaning Tokio, Maydzuru va Takasaki shaharlarida o‘zbek madaniyati va san’atini targ‘ib qilish maqsadida, madaniy tadbirlar tashkil etildi. Hukumat vakillari bilan madaniyat sohasidagi hamkorlikni rivojlantirish yuzasidan uchrashuvlar o‘tkazildi.  Ikki davlat madaniyat muassasalari o‘rtasida ham faol hamkorlik yo‘lga qo‘yilgan. Chunonchi, Rishsho universiteti bilan Termiz arxeologiya muzeyi o‘rtasida bitim imzolangan bo‘lib, bunga asosan, arxeologiya va muzey sohasida hamkorlik qilinmoqda. Zero, davlatlarimiz o‘rtasida madaniyat sohasida o‘rnatilgan hamkorlik soha vakillarining bilim doirasini oshirib, turli madaniy tadbirlar geografiyasini kengaytiradi. O‘zbekistonda o‘tkazilayotgan xalqaro festivallarda Yaponiya san’atkorlarining doimiy ishtiroki quvonarli voqea, albatta.

Xususan, “Sharq taronalari” xalqaro musiqa festivalida “Nagauta-kai” yapon shamisen musiqa guruhi faol  ishtirok etib, nufuzli birinchi o‘rinni qo‘lga kiritgani fikrimiz dalilidir. Bundan tashqari, 2018 yilda Shahrisabzda o‘tkazilgan xalqaro maqom san’ati anjumanida yaponiyalik ijodkor Kamuzaki Mashuu  uchinchi o‘rinni egallab, muxlislar olqishiga sazovor bo‘lgani alohida e’tiborga molik.

 Joriy yil boshlanishida CSPC-Japan tashkiloti tomonidan
Yaponiyaning Tokio shahrida tashkil etilgan “Tokio xalqaro san’at festivali” hamda “Xalqaro kolloboratsiya konserti”da Toshkent shahrida joylashgan Madaniyat vazirligiga qarashli R.Glier nomidagi respublika ixtisoslashgan musiqa maktabi o‘quvchilari   ishtiroki ikki hamkor mamlakatning madaniy aloqalar ko‘lami naqadar kengayib borayotganiga yana bir misoldir.

 O‘zbek-yapon xalqlarining madaniy va savdo aloqalari uzoq o‘tmishga borib taqalishini,  “Buyuk ipak yo‘li” bo‘ylab bu ikki millatning o‘zaro manfaatli aloqalari mustahkam do‘stlik va hamkorlik darajasida shakllanib borayotganini alohida ta’kidlamoqchiman.  Davlatimiz rahbarining Yaponiyaga tashrifi arafasida “O‘zbekiston madaniyat kunlari” tadbirlarining bu diyorda  bo‘lib o‘tgani ham ikki davlat rahbarlarining o‘zaro hurmat va ishonchli hamkorlik yo‘lidagi sa’y-harakatlari amaliy natijasidir. Bunday qalbga yaqin san’at bayramining o‘tkazilishi nafaqat madaniy hayotimizdagi muhim voqea, balki  Osiyo mintaqasida o‘ziga xos hurmat va e’tiborga loyiq tadbir, hamkorlar o‘rtasidagi  iliq munosabatning yana bir yorqin ifodasi ekanligi sir emas.

Ta’kidlaganimizdek, O‘zbekiston va Yaponiya xalqlarini qadimiy tarix, boy madaniyat, an’analarga sadoqat va kelajakka ishonch birlashtirib turadi. Ikki tinchlikparvar mamlakat o‘rtasidagi munosabatlarning tobora mustahkamlanib, siyosiy, iqtisodiy va ayniqsa, madaniy sohalarda izchil rivojlanayotgani, xalqlarimiz baxti va saodatidan darak beradi.

O‘zbekiston Respublikasi Prezidenti Shavkat Mirziyoyev rahbarligida mamlakatimizda amalga oshirilayotgan keng ko‘lamli islohotlar tufayli jamiyat hayotining barcha sohalari rivojlanib, O‘zbekiston ochiq va zamonaviy davlat sifatida dunyoga yanada tanilib bormoqda.

Xalqlar o‘rtasidagi madaniy  aloqalar tinch, osoyishta va ma’rifatli davlatlarga yarashadi. O‘zbekiston va Yaponiya xuddi shunday mamlakatlar sirasiga kiradi. Dunyoda tinchlik va ezgulikni  saqlash o‘zbek, yapon xalqlarining azaliy orzusidir!  Shu narsa ayonki, barqaror tinchlik, osoyishtalik hukm surgan o‘lkalarda  san’at va madaniyat gullab-yashnaydi!

O‘zbekiston Respublikasi Madaniyat vaziri  -  Ozodbek Nazarbekov