O‘zbekiston Respublikasi Prezidentining “Lazgi” xalqaro raqs festivalini tashkil etish va o‘tkazish to‘g‘risida” 2020 yil 29 sentyabrdagi 4843-sonli qaroriga asosan joriy yil 26–30 aprel kunlari Xiva shahrida II “Lazgi” xalqaro raqs festivali o‘tkazildi.

Festivalda 22 ta xorijiy davlat raqs jamoasi va yakkaxon ijrochilar ishtirok etishdi. Shundan 185 nafari tanlov, 23 nafari konferensiya ishtirokchisi, 5 nafari hakamlar hay’ati a’zosi va 5 nafari faxriy mehmon.

27 aprel kuni “Ichan qal’a” majmuasida festivalning tantanali ochilish marosimi bo‘lib o‘tdi. Shu kuni “Farovon” mehmonxonasida xorijiy va mahalliy raqs san’ati ustalari, musiqashunos va san’atshunos olimlar, taniqli san’atkorlar ishtirokida “Xorazm “Lazgi” raqsi: Madaniy diplomatiyani rivojlantirishning ilmiy-nazariy, ma’naviy-ma’rifiy tamoyillari” mavzusida xalqaro ilmiy-amaliy konferensiya o‘tkazildi.

28-29 aprel kunlari festival doirasida raqs tanlovi o‘tkazilib, unda xorijiy va mahalliy ishtirokchilar ijodiy bellashishdi. 30 aprel kuni festivalning tantanali yopilish va g‘oliblarini taqdirlash marosimi tashkil etildi.

Festival tanlovi ishtirokchilari chiqishlari Fransiya, Misr, Braziliya, Koreya, Qozog‘iston va O‘zbekiston vakillaridan iborat xalqaro hakamlar hay’ati a’zolari tomonidan baholab borildi. Hakamlar hay’ati xulosasiga ko‘ra festival g‘oliblari munosib taqdirlandi:

Xorazm viloyati hokimiyatining maxsus esdalik sovg‘alari bilan

“Eng yaxshi yakkaxon raqs ijrochisi” O‘zbekiston Davlat filarmoniyasining “Navbahor” ashula va raqs ansambli raqqosasi Fotima Narzullayeva hamda O‘zbekiston davlat filarmoniyasining Xorazm viloyati bo‘linmasi raqqosasi Oksana Davletova;

“Eng yaxshi jamoaviy raqs ijrosi uchun” ikki jamoa taqdirlanadi: Turkmaniston Respublikasining Dashoguz viloyatining “Dessan” raqs ansambli va Belarus Davlat madaniyat va san’at instituti;

“Eng yaxshi sahnalashtirilgan raqs ijrosi uchun” ham ikki davlat vakillari taqdirlanadilar: Gruziyaning “Erisioni” Davlat milliy ashula va raqs ansambli hamda Serbiyaning “Bolqon afsonasi” jamoasi;

“Nomoddiy madaniyatni targ‘iboti uchun” Yaponiyaning Toshiba xalqaro uyushmasi ijodiy jamoasi taqdirlandi.

O‘zbekiston davlat filarmoniyasining Buxoro viloyati bo‘linmasi qoshidagi “Buxoro mavjlari” raqs ansambli Xalqaro turkiy madaniyat tashkiloti TURKSOYning maxsus mukofoti bilan taqdirlandi.

3-o‘rin sovrindorlari:

“Eng yaxshi yakkaxon raqs ijrochisi” nominatsiyasi bilan Braziliyadan tashrif buyurgan Bruna Vicente de Souza;

“Eng yaxshi jamoaviy raqs uchun” nominatsiyasi bilan ikki jamoa taqdirlanadi. Ispaniyadan tashrif buyurgan raqs jamoasi hamda O‘zbekiston davlat filarmoniyasining “Lazgi” ashula va raqs ansambli;

“Eng yaxshi sahnalashtirilgan raqs” nominatsiyasi bilan Turkiyaning “Inego‘l” xalq raqslari ansambli.

2-o‘rin sovrindorlari:

“Eng yaxshi yakkaxon raqs ijrochisi” Koreya Respublikasidan Alam Han hamda Koreya Milliy raqs guruhi;

“Eng yaxshi jamoaviy raqs uchun” nominatsiyasi bilan ikki jamoa taqdirlanadi. Bular, Rossiya Federatsiyasi Boshqirdiston Respublikasi Fayzi Gaskarov nomidagi Davlat akademik xalq raqs ansambli hamda Tojikiston Respublikasida xizmat ko‘rsatgan “LOLA” raqs ansambli;

“Eng yaxshi sahnalashtirilgan raqs” nominatsiyasi bilan Qirg‘iziston Respublikasidan “Shattik” xalq raqs ansambli. Birinchi o‘rin sohiblari:

“Eng yaxshi yakkaxon raqs ijrochisi” O‘zbekiston davlat filarmoniyasining “Shodlik” ashula va raqs ansambli balet artisti Islom Xaydarov; Ozarbayjon davlat filarmoniyasi Davlat raqs ansambli hamda Qozog‘istonning “Kazina” xalq raqs ansambli;

“Eng yaxshi sahnalashtirilgan raqs” nominatsiyasi bilan Rossiya Federatsiyasining Davlat filarmoniyasining “Ogonki” rus raqsi ansambli.

Gran-Pri” g‘olibi:
O‘zbekiston davlat filarmoniyasining Xorazm viloyati bo‘linmasi.

Ma’lumot uchun: «Gran-Pri»  mukofoti - 7 000 AQSH dollarini tashkil etadi. 1-2-3- o‘rinlarni qo‘lga kiritganlar uchun mos ravishda har bir yo‘nalishda 3 ta nominatsiya (“Eng yaxshi yakkaxon raqs ijrochisi”, “Eng yaxshi raqs jamoasi”, “Eng yaxshi sahnalashtirilgan raqs”) bo‘yicha 5 000, 3000, 2000 AQSH dollaridan mukofotlandi.