Fransiyaning “Avinion” teatr festivali vakillari bilan hamkorlik uchrashuvi bo‘lib o‘tdi
2025-12-04 17:40:00 / Yangiliklar
Bugun, 4-dekabr kuni Madaniyat vazirligida vazirning birinchi o‘rinbosari Avazxon Tadjixanov hamda Fransiyaning “Avinion” teatr festivali vakillari o‘rtasida hamkorlik uchrashuvi bo‘lib o‘tdi.
Xabaringiz bor, joriy yilning yoz oyida Fransiyada “Avinion” teatr festivali bo‘lib o‘tgan edi. Unda, O‘zbekiston davlat yosh tomoshabinlar teatri jamoasi rejissyor O‘zbekistonda xizmat ko‘rsatgan artist Malika Iskandarova tomonidan sahnalashtirilgan “Masxaraboz shou” (“Clown show”) spektakli bilan tarixda ilk marotaba ushbu nufuzli festivalda ishtirok etgandi.
Uchrashuv davomida festival vakillari joriy yilning yoz oylarida Fransiyada bo‘lib o‘tgan festivalda, O‘zbekiston teatri vakillarining namoyishi barcha festival tomoshabinlariga manzur bo‘lganligi haqida ma’lum qilishdi va 2026-yilda ushbu festivalga O‘zbekistonning tegishli teatr jamoasi ishtirok etishini taklif qilishdi.
O‘zbekiston tomoni o‘z navbatida ushbu nufuzli teatr festivalida ishtirok etishidan mamnunligini bildirib, festivalda ishtirok etish taklifini ko'rib chiqishlarini ma’lum qilishdi.