O‘zbekiston Respublikasi Madaniyat vazirligi

Kuni kecha soha vakillari uchun iqtisodiy o‘qish tashkil etildi. Ushbu iqtisodiy o‘qishda, vazirlik markaziy apparati tarkibiy bo‘linmalari, hududiy madaniyat organlari, respublika tashkilotlari hamda davlat teatrlari rahbarlari va ijro intizomiga mas’ul xodimlar onlayn va oflayn tarzda ishtirok etdi.

 

Madaniyat vaziri o‘rinbosari Murodjon Majidov raisligida o‘tgan ushbu iqtisodiy o‘qishda “Ijro.gov.uz” tizimida 2025-yil yanvar-oktyabr oylaridagi O‘zbekiston Respublikasi Prezidenti, O‘zbekiston Respublikasi Prezidenti Administratsiyasi rahbari va O‘zbekiston Respublikasi Vazirlar Mahkamasining nazorat topshiriqlarining ijrosi yakunlari hamda 2025-yilning noyabr-dekabr oylarida barcha topshiriqlarni samarali va to‘liq hajmda bajarish yuzasidan kechiktirib bo‘lmaydigan chora-tadbirlar to‘g‘risida so‘z bordi.

 

Iqtisodiy o‘qishda kun tartibidagi asosiy masala ijro intizomi bo‘yicha bo‘lib o‘tdi. Mavzu yuzasidan vazirlikning Ijro intizomi bo‘limi boshlig‘i Davur Shukurov hisobot berdi.

 

“Xabaringiz bor O‘zbekiston Respublikasi Prezidentining 2021 yil 31-maydagi PQ–5132-son qarorining 2-ilovasiga muvofiq Mahalliy ijro etuvchi hokimiyat organlari tomonidan “Ijro.gov.uz” ijro intizomi idoralararo yagona elektron tizimida qonunlar, O‘zbekiston Respublikasi Prezidentining Farmon, qaror, farmoyish va topshiriqlari ijrosi bo‘yicha nazorat va hisobdorlikni tashkil etish tartibi belgilangan.

 

Ushbu tartibga binoan tasdiqlangan normativ huquqiy-hujjatlar uchun 3 kun muddatda vazirlik o‘z nazorat-rejasini tasdiqlaydi va ijrochilarni belgilaydi, shunday ekan, asosiy ijrochi albatta Sizlar hisoblanasizlar.

 

Ushbu yil yakuniga qadar o‘z oldimizga maqsad qilib qo‘yishimiz zarur bo‘lgan ushbu 4 narsani ta’kidlashim kerak.

 

1. Muddati o‘tgan topshiriqlarni bartaraf etish:

Har bir rahbar tizimdagi o‘ziga biriktirilgan topshiriqlar bo‘yicha kunlik monitoring olib borishi zarur.

2. Ijro sifati ustidan qat’iy nazorat o‘rnatish.

Har bir bajarilgan topshiriq amaliy natija berishi, aholiga yoki soha rivojiga foyda keltirishi lozim.

3. Tizimdan foydalanish madaniyatini oshirish.

Xodimlar uchun qo‘shimcha o‘quv-seminarlar o‘tkazish, yangilangan interfeys va imkoniyatlardan samarali foydalanish muhim.

4. Mas’uliyatni shaxsiylashtirish.

Har bir ijrochi o‘z faoliyati uchun bevosita javobgar ekanini his qilishi kerak.

 

Mana hududlarga, teatrlarga, respublika tizim tashkilotlariga o‘rganishlarga chiqyapmiz, ko‘p tashkilotlarimizda Bolalar musiqa va san’at maktablari va tuman, shahar madaniyat bo‘limlarida ish yuritish bo‘yicha surunkali kamchiliklar aniqlanmoqda.

 

Bular: tuman bo‘limi mudiri hamda markaz direktorlari ish rejalari monitoringi yuritilmasligi, ish reja bilan tuman madaniyat bo‘limi ijrosini ta’minlay olmaydigan, amalga oshirish mumkin bo‘lmagan vazifalar tasdiqlanganligi, sohaga oid normativ-huquqiy hujjatlar bo‘yicha muhokamalar o‘tkazilmaganligiga ko‘p marotaba guvoh bo‘lmoqdamiz.

 

Bolalar musiqa va san’at maktablarida buyruqlarni ro‘yxatga olish kitoblari noto‘g‘ri yuritilishi, ijro intizomiga mas’ul xodimning ish yuritish tartiblari bo‘yicha bilim va ko‘nikmalarga ega emasligi, hujjatlarni ro‘yxatga olish kitob lari noto‘g‘ri yoki umuman yuritilmaslik holatlariga ko‘p marotaba duch kelmoqdamiz. Bu kamchiliklarni bartaraf etish zarur.” – dedi Davur Shukurov.

 

Shuningdek, yig‘ilishda Davlat rahbari tomonidan imzolangan PF–117-son Farmonning asosiy mazmun mohiyati va PF–6166-son Farmoniga bir qator o‘zgartirish va qo‘shimchalar kiritilganligi, Administratsiya rahbari va hukumat topshiriqlari ijrosi yuzasidan nazorat kuchaytirilganligi, bugungi kunda ushbu Farmonning tegishli bandiga ko‘ra, O‘zbekiston Respublikasi Hukumati qarorlari ijrosi nazorati ham Adliya vazirligiga o‘tkazilganligi, O‘zbekiston Respublikasi Prezidenti Administratsiyasi rahbarining topshiriqlari ham “Ijro.gov.uz” tizimi orqali olib borilishi belgilaganligi ma’lum qilindi.

 

 

“Joriy yilning 10 oyi davomida Prezidentimizning 30 ta Farmoni, 86 ta qarori, 2 ta farmoyishi va 46 ta bayoni doirasida berilgan jami vazirlik tomonidan O‘zbekiston Respublikasi Prezidentining jami 1 367 ta topshiriqlari ijrosi ta’minlandi.

Shuningdek, joriy yilning noyabr va dekabr oylarida Madaniyat vazirligi tomonidan bajarilishi lozim bo‘lgan O‘zbekiston Respublikasi Prezidentining jami 363 ta topshiriqlari mavjud, ularning 255 tasi (70%)da vazirlik asosiy ijrochi etib belgilangan. Albatta bu topshiriqlar soni yil yakuniga qadar bundan ko‘payadi.

Ushbu, Madaniyat vazirligi ijrochi etib belgilangan topshiriqlar ijrosi ta’minlanishida vazirlik tasarrufidagi barcha tashkilotlar alohida o‘ringa ega.” – dedi Murodjon Majidov.

 

“Ijro.gov.uz” tizimining bosh maqsadi — ijro intizomini mustahkamlash, mas’ul tashkilotlar o‘rtasida samarali axborot almashuvini yo‘lga qo‘yish va har bir topshiriqning bajarilish jarayonini onlayn tarzda kuzatish imkoniyatini yaratishdir.

 

Bu tizim tufayli: har bir vazirlik va idoraning ish samaradorligi oshayotganligi, ortiqcha qog‘ozbozliklar va byurokratik kechikishlar kamayganligi, ijro uchun mas’ullar faoliyati shaffof tarzda nazorat qilinayotganligi, “Ijro.gov.uz” tizimi — bu nafaqat hisobot platformasi, balki tartib-intizom, mas’uliyat va natijadorlikni o‘lchovchi vosita ekanligi ma’lum qilindi.

 

Shu bois, 2025-yilning qolgan ikki oyi davomida barcha tashkilotlar topshiriqlarni samarali, sifatli va to‘liq hajmda bajarishi lozimligi aytildi.

 

Oquv yakunida iqtisodiy o‘qish bo‘yicha savollarga javoblar berildi.