O‘zbekiston Respublikasi Energetika bozorini rivojlantirish va tartibga solish agentligi

Hurmatli hamkasblar! Qadrli yurtdoshlar!

Mamlakatimizda amalga oshirilayotgan keng ko‘lamli islohotlar davlat boshqaruvining barcha sohalarida qonuniylik, ochiqlik va hisobdorlik tamoyillarini yana-da mustahkamlashni taqozo etmoqda. Yangi O‘zbekiston taraqqiyotining ustuvor maqsadlaridan biri – xalq manfaatlariga xizmat qiladigan, halol, professional va samarali davlat boshqaruvi tizimini shakllantirishdan iborat.

Bu vazifalarni amalga oshirishda iqtisodiyotning strategik tarmog‘i hisoblangan energetika sohasining o‘rni alohida ahamiyatga ega. Energetika bozorining barqaror rivojlanishi, raqobat muhitini kengaytirish, investitsiyalar uchun qulay huquqiy muhit yaratish hamda isteʼmolchilar manfaatlarini ishonchli himoya qilish, eng avvalo, tartibga solish jarayonlarining qonuniyligi, xolisligi va shaffofligiga bog‘liq.

Energetika bozorini rivojlantirish va tartibga solish agentligi o‘z faoliyatida qonun ustuvorligi, adolat, ochiqlik, xolislik va hisobdorlik tamoyillariga qatʼiy amal qilishni bosh mezon deb biladi. Agentlikning asosiy vazifasi nafaqat energetika bozorini samarali tartibga solish, balki sog‘lom raqobat muhitini rivojlantirish, bozor ishtirokchilari uchun teng huquqiy shart-sharoitlarni taʼminlash va davlat boshqaruviga nisbatan jamoatchilik ishonchini mustahkamlashdan iborat.

Bugun davlat organlari faoliyati samaradorligi qabul qilinayotgan qarorlar soni bilan emas, balki ularning qonuniyligi, asosliligi, ochiqligi va inson manfaatlariga qanchalik xizmat qilishi bilan baholanmoqda. Shu nuqtai nazardan, har bir qaror yuksak masʼuliyat, puxta tahlil va qonunchilik talablari asosida qabul qilinishi shart.

Korrupsiya har qanday sohada taraqqiyotga to‘sqinlik qiladigan, davlat boshqaruvi samaradorligini pasaytiradigan va jamoatchilik ishonchiga putur yetkazadigan jiddiy xavf hisoblanadi. Shu bois korrupsiyaga qarshi kurashishni faqat huquqbuzarliklarga munosabat bildirish bilan cheklab bo‘lmaydi. Asosiy eʼtibor korrupsiya xavflarini keltirib chiqaradigan omillarni barvaqt aniqlash, ularni bartaraf etish, inson omilini qisqartirish, raqamli boshqaruvni kengaytirish hamda boshqaruv jarayonlarida institutsional halollikni taʼminlashga qaratilishi lozim.

Agentlikda manfaatlar to‘qnashuvining oldini olish, ichki nazorat va komplayens tizimlarini takomillashtirish, litsenziyalash va tartibga solish jarayonlarining ochiqligini taʼminlash, davlat xizmatlarini ko‘rsatish sifatini oshirish hamda zamonaviy axborot texnologiyalarini keng joriy etish ustuvor vazifalardan biri bo‘lib qoladi.

Energetika bozorining barqaror rivojlanishi huquqiy barqarorlik, shaffof tartibga solish va adolatli qaror qabul qilishga bevosita bog‘liq. Bu esa mahalliy va xorijiy investorlar ishonchini mustahkamlashga, sog‘lom raqobat muhitini rivojlantirishga hamda sohaning uzoq muddatli barqaror taraqqiyoti uchun mustahkam zamin yaratadi.

Hurmatli hamkasblar!

Har bir davlat xizmatchisining kasbiy mahorati, halolligi va masʼuliyati davlat organining nufuzini belgilaydi. Davlat xizmati, eng avvalo, xalq ishonchini oqlash, qonunlarga so‘zsiz rioya qilish, xizmat vakolatlaridan faqat jamiyat va davlat manfaatlari yo‘lida foydalanish hamda yuksak odob-axloq tamoyillariga sodiq qolish demakdir.

Halollik har bir qarorning, xolislik har bir munosabatning, masʼuliyat esa har bir amaliy harakatning asosiy mezoniga aylanishi lozim. Ana shundagina davlat boshqaruvining samaradorligi va jamoatchilik ishonchi yana-da mustahkamlanadi.       

Qadrli yurtdoshlar! 

Energetika sohasida amalga oshirilayotgan islohotlarning samarasi davlat organlari va jamoatchilik o‘rtasidagi o‘zaro ishonch va samarali hamkorlik bilan chambarchas bog‘liq. Sizlarning murojaatlaringiz, taklif va fikr-mulohazalaringiz Agentlik faoliyatini yana-da takomillashtirishda muhim ahamiyat kasb etadi.  

Agar Agentlik xodimlarining korrupsiyaviy xatti-harakatlari, manfaatlar to‘qnashuvi yoki qonunchilik talablarining buzilishi bilan bog‘liq holatlar haqida maʼlumotga ega bo‘lsangiz, Agentlikning ishonch telefoni 55 520-10-99 (4008) yoki info@emdra.uz elektron pochta manzili orqali murojaat qilishingizni so‘raymiz. 

Barcha murojaatlar qonunchilikda belgilangan tartibda xolisona ko‘rib chiqiladi, murojaat etuvchilarning huquqlari va taqdim etilgan maʼlumotlarning maxfiyligi kafolatlanadi.

Biz uchun halollik — tanlov emas, xizmat faoliyatimizning ustuvor tamoyilidir. Qonuniylikka tayangan boshqaruv, ochiq qaror qabul qilish va yuksak masʼuliyat tuyg‘usi energetika bozorini barqaror rivojlantirish, jamiyat ishonchini mustahkamlash hamda Yangi O‘zbekiston taraqqiyotiga munosib hissa qo‘shishning eng muhim kafolatidir.

                                                                                                Sh. Xodjayev
Energetika bozorini rivojlantirish
va tartibga solish agentligi direktori